ТИВ ЖЧ–2026 учун ўзбекистонлик мухлисларга мурожаат қилди

Тошкент, Ўзбекистон (UzDaily.uz) — Ўзбекистон Ташқи ишлар вазирлиги 2026 йилги футбол бўйича жаҳон чемпионати ўйинларини томоша қилиш ва миллий терма жамоани қўллаб-қувватлаш мақсадида АҚШ ва Мексикага боришни режалаштираётган фуқароларга мурожаат қилди.

Оммавий ахборот воситалари вакилларининг саволларига жавоб берар экан, ТИВ матбуот котиби Омонулла Файзиев жаҳон чемпионати 2026 йил 11 июндан 19 июлгача АҚШ, Канада ва Мексикада бўлиб ўтишини эслатди. У мустақил Ўзбекистон тарихида илк бор миллий терма жамоа жаҳон чемпионатида иштирок этишини таъкидлади.

Вазирлик мухлисларга қабул қилувчи давлатларнинг кириш тартиби, виза ва миграция талаблари билан олдиндан танишишни, зарур ҳужжатларни ўз вақтида расмийлаштиришни ҳамда уларнинг амал қилиш муддатини текширишни тавсия қилди.

Шунингдек, фуқароларга паспорт ва бошқа муҳим ҳужжатларнинг асл нусхаларини доим ёнида олиб юриш, шу билан бирга уларнинг электрон ва қоғоз нусхаларини сақлаш тавсия этилди. Қабул қилувчи мамлакатлар қонунчилигига, ҳуқуқни муҳофаза қилувчи органлар талабларига ва жамоат жойларидаги умумий хулқ-атвор қоидаларига қатъий риоя қилиш зарурлигига алоҳида эътибор қаратилди.

ТИВ сафар йўналишларини олдиндан режалаштиришни, расмий транспорт ва ахборот хизматларидан фойдаланишни, одамлар гавжум жойларда шахсий хавфсизлик чораларига амал қилишни ҳамда рухсат этилмаган оммавий тадбирларда иштирок этишдан тийилишни тавсия қилди.

Фавқулодда ҳолатлар юзага келганда, ҳужжатлар йўқолганда ёки бошқа муаммолар пайдо бўлганда фуқароларга маҳаллий тезкор хизматларга, шунингдек, Ўзбекистоннинг АҚШдаги дипломатик ваколатхоналарига мурожаат қилиш тавсия этилди.

Ташқи сиёсат идораси ўзбекистонлик мухлисларни хорижда мамлакатни муносиб тарзда намоён этишга, қабул қилувчи давлатларнинг қонунлари, жамоат тартиби, маҳаллий анъаналари ва маданиятига ҳурмат билан муносабатда бўлишга чақирди.

ТИВда таъкидланишича, жаҳон чемпионати давомида Ўзбекистон ва унинг фуқароларига бўлган эътибор сезиларли даражада ортади. Шу боис ҳар бир ватандош нафақат мухлис, балки ўз мамлакатининг вакили сифатида қабул қилинади.

Вазирлик зарурат туғилганда фуқароларга консуллик-ҳуқуқий ёрдам кўрсатишга ва уларнинг хориждаги қонуний манфаатларини ҳимоя қилиш бўйича ишларни давом эттиришга тайёр эканини тасдиқлади.