Танташевнинг ЖЧдаги ҳакамлиги кескин танқидларга учради

Тошкент, Ўзбекистон (UzDaily.uz) — Ўзбекистонлик ҳакам Илгиз Танташевнинг футбол бўйича жаҳон чемпионати 1/8 финалида Франция ва Парагвай терма жамоалари ўртасидаги учрашувдаги фаолияти қатор хорижий оммавий ахборот воситалари ва футбол экспертлари томонидан кескин танқид қилинди.

Франциянинг L'Equipe нашри ҳамда Archivo VAR таҳлилий портали ҳакамлар бригадаси ишига ўн баллик тизимда бир балл баҳо берди. Танқидчилар фикрича, ҳакам ўйин назоратини сақлаб қола олмаган ва бир қатор вазиятларни баҳолашда хатоларга йўл қўйган.

Қайд этилишича, Танташев экспертлар фикрига кўра Парагвай футболчилари томонидан содир этилган бир нечта қўпол қоидабузарликларга, жумладан Килиан Мбаппе ва Франция терма жамоасининг бошқа ўйинчиларига нисбатан қилинган ҳаракатларга муносабат билдирмаган. Шунингдек, парагвайликлар дарвозасига пенальти фақат VAR тизими аралашувидан кейин белгиланган.

Парагвай терма жамоаси 1998 йилги жаҳон чемпионатидан бери илк бор учрашувни бирорта ҳам сариқ карточкасиз якунлади. Келтирилган маълумотларга кўра, жанубий америкаликлар 13 марта, французлар эса 10 марта қоидаларни бузган. Учрашувдаги барча учта огоҳлантириш Франция футболчилари — Брэдли Баркола, Куадио Коне ва Майкл Олисе ҳисобига ёзилди.

Ўйин давомида бир нечта баҳсли вазиятлар юз берди. Жумладан, Парагвай ярим ҳимоячиси Матиас Галарса Фонданинг икки қўпол ҳаракати кўплаб экспертлар фикрича жазосиз қолган. Шунингдек, баҳс футболчилар иштирокидаги икки оммавий тўқнашув билан ҳам кечди.

Германиялик ҳакамлик эксперти Патрик Иттрих ўзбекистонлик ҳакамнинг ишини «фожиавий» деб баҳолади. Собиқ футболчи Эдуард Мор эса рефери «ўйин ипини қўлдан чиқарганини» таъкидлади.