Собиқ ИИВ ўринбосари Абдуллаев иши судда кўрилади

Тошкент, Ўзбекистон (UzDaily.uz) — Янгихаёт тумани жиноят ишлари бўйича суди ички ишлар вазирининг собиқ ўринбосари — Жамоат хавфсизлиги департаменти бошлиғи Бекмурод Абдуллаевга оид жиноят ишини кўриб чиқишни бошлайди. Судда биринчи мажлис 29 июль кунига белгиланган. Бу ҳақда суд хабар берди.

Абдуллаевга Ўзбекистон Жиноят кодексининг ўзлаштириш ёки растрата йўли билан талон-торож қилиш учун жавобгарликни назарда тутувчи 167-моддасининг бир нечта банд ва қисмлари бўйича айбловлар қўйилган. Жами иш бўйича 30 киши судланмоқда. Уларнинг аксариятига мазкур модданинг 3-қисми «а» ва «в» бандлари бўйича айбловлар қўйилган.

Абдуллаев 2021 йил апрель ойидан ички ишлар вазирининг ўринбосари — Жамоат хавфсизлиги департаменти бошлиғи лавозимида ишлаган. 2025 йил ноябрь ойида у эгаллаб турган лавозимидан озод этилган. 2026 йил январь ойида эса унинг қўлга олиниб ва қамоққа олингани маълум бўлган.