Тошкент, Ўзбекистон (UzDaily.uz) — Самарқандда ҳуқуқни муҳофаза қилувчи органлар ходимлари томонидан Вазирлар Маҳкамаси ҳузуридаги Техник тартибга солиш соҳасида назорат инспекциясининг бош мутахассиси пора олганликда гумонланиб қўлга олинди. Бу ҳақда Давлат хавфсизлик хизмати матбуот хизмати хабар берди.
Тергов маълумотларига кўра, инспекция ходими шаҳардаги ғишт заводларидан бирида текширув ўтказар экан, қасддан қонунбузилиш ҳолатларини кўпайтириб кўрсатган. У тадбиркорга корхона сифатсиз маҳсулот ишлаб чиқаргани учун 226 миллион сўм жаримага тортилиши мумкинлигини айтган.
Бироқ, у тадбиркорга 3000 АҚШ доллари эвазига текширув натижаларини «юмшатиш» ва жаримани 25 миллион сўмгача камайтиришни таклиф қилган.
Шундан сўнг, мансабдор шахс ўз хизмат хоналарида 2500 доллар миқдоридаги пора пулини олаётган пайтда ушланган.
Ушбу ҳолат юзасидан Ўзбекистон Республикаси Жиноят кодексининг 210-моддаси 2-қисми "в" банди (пора олиш) бўйича жиноят иши қўзғатилган. Гумонланувчи ҳибсга олинган, тергов ҳаракатлари олиб борилмоқда.
Эслатиб ўтамиз, аввалроқ Ўзбекистонда солиқ инспектори 40 доллар пора олгани учун 2 йил озодликдан маҳрум этилган, унинг уч нафар фарзанди борлиги маълум қилинган эди.
