Саида Мирзиёева наркотикларга қарши янги қонунни назоратга олди

Тошкент, Ўзбекистон (UzDaily.uz) — Ўзбекистон Президенти Администрацияси раҳбари Саида Мирзиёева Президент Шавкат Мирзиёев томонидан имзоланган ва наркотик воситаларнинг ноқонуний айланмасига қарши курашни кучайтиришга қаратилган янги қонун ижросини шахсий назоратга олишини маълум қилди.

Саида Мирзиёеванинг сўзларига кўра, янги ҳужжат наркотиклар савдосига қарши муросасиз чораларни назарда тутади ҳамда жамиятни, фуқаролар саломатлигини ва келажак авлодларни ҳимоя қилишга қаратилган. У наркотиклар оилаларни вайрон қилиши, болалар саломатлигига зарар етказиши ва мамлакат келажагига таҳдид солишини таъкидлади.

Президент Администрацияси раҳбари қонун наркотикларни тарқатишнинг замонавий усулларини ҳисобга олишини, тегишли жиноятлар учун жавобгарликни кучайтиришни назарда тутиши ҳамда вояга етмаганларни ҳимоя қилишга алоҳида эътибор қаратишини қайд этди.

Янги нормаларга мувофиқ, илгари қонунчиликда бевосита назарда тутилмаган қилмишлар учун жиноий жавобгарлик жорий этилмоқда. Хусусан, яширин нарколабораториялар ва наркотик моддалар истеъмол қилинадиган жойларни ташкил этиш, наркожиноятчиликка ҳомийлик қилиш, шунингдек интернет орқали ва трансмиллий схемалардан фойдаланган ҳолда наркотикларни тарқатиш шулар жумласидандир. Бундай жиноятлар учун 20 йилгача озодликдан маҳрум қилиш жазоси белгиланган.

Шунингдек, уюшган наркожиноятчилик учун жавобгарлик чоралари сезиларли даражада кучайтирилди. Бундай жиноятлар учун ҳукм қилинган шахслар энди шартли равишда муддатидан олдин озод этилиш имкониятидан фойдалана олмайди ва белгиланган жазо муддатини тўлиқ ўташи талаб этилади.

Қонуннинг алоҳида қисми болалар ва ўсмирларни ҳимоя қилишга бағишланган. Вояга етмаганларни наркотик истеъмолига ундаш эндиликда оғир жиноятлар тоифасига киритилди ва беш йилдан ўн йилгача озодликдан маҳрум қилиш билан жазоланади. Худди шундай жавобгарлик вояга етмаганларни мактаблар, таълим муассасалари, талабалар турар жойлари ва болалар соғломлаштириш оромгоҳларида наркожиноятчиликка жалб қилиш ҳолатларига нисбатан ҳам белгиланган.

Саида Мирзиёева қонуннинг асосий мақсади фақат жиноятчиларни жазолаш эмас, балки аҳоли саломатлигини муҳофаза қилиш, миллат генофондини сақлаш ва ёшларни наркотик муҳитига жалб этилишининг олдини олиш эканини таъкидлади.

Унинг маълум қилишича, Президент Администрацияси ҳузурида наркотикларга қарши кураш бўйича Республика махсус ишчи гуруҳи фаолият юритмоқда. Ушбу гуруҳ нарколабораториялар ҳамда наркотик воситаларнинг ноқонуний айланмаси билан боғлиқ уюшган жиноий гуруҳларни аниқлаш ва бартараф этиш билан шуғулланади.

Ота-оналарга мурожаат қилар экан, Саида Мирзиёева уларни ёшлар ўртасида гиёҳвандликка қарамликнинг олдини олиш ишларида фаол иштирок этишга ва давлатнинг наркожиноятчиликка қарши курашдаги саъй-ҳаракатларини қўллаб-қувватлашга чақирди. У болалар келажаги бутун мамлакат келажаги эканини алоҳида таъкидлади.