Қирғизистонда «Хитой — Қирғизистон — Ўзбекистон» темир йўлидаги энг баланд кўприк қурилмоқда
Тошкент, Ўзбекистон (UzDaily.uz) — Қирғизистоннинг Жалолобод вилояти Сузоқ туманида «Хитой — Қирғизистон — Ўзбекистон» темир йўлидаги энг баланд кўприк қурилиши давом этмоқда.
Кеч-Олат дарёси устидан қурилаётган кўприкнинг умумий узунлиги 956,67 метрни ташкил этади. Унинг энг баланд таянчи 96 метр, иншоотнинг умумий баландлиги эса 122 метрга етади.
Қирғизистоннинг «Туусу» ахборот агентлиги маълумотларига кўра, мазкур кўприк «Хитой — Қирғизистон — Ўзбекистон» темир йўлининг бутун йўналиши бўйлаб энг баланд иншоот бўлади.
Айни вақтда кўприк пойдеворини қуриш ишлари тўлиқ якунланган. Таянчлар ва устунларни қуриш ишлари 54 фоизга бажарилган.
«Хитой — Қирғизистон — Ўзбекистон» темир йўл лойиҳаси Хитойни Қирғизистон ва Ўзбекистон билан боғлаши керак бўлган янги транспорт йўлагини ташкил этишни назарда тутади.
Кўприк қурилаётган ҳудуддан эксклюзив кадрларни «Туусу» ахборот агентлиги тақдим этди.
