«Пойтахтбанк» раиси Дилшод Пўлатов лавозимини тарк этди

Тошкент, Ўзбекистон (UzDaily.uz) — 2026 йил 20 апрель куни хусусийлаштирилган «Пойтахтбанк»нинг ягона акциядори томонидан Бошқарув раиси Дилшод Акмалевич Пўлатовнинг ваколатларини муддатидан олдин тугатиш тўғрисида қарор қабул қилинди. У банкни 2025 йил сентябридан бошлаб бошқариб келган бўлиб, унга қадар банк тизимида, жумладан банклардан бирида раиснинг биринчи ўринбосари лавозимида ишлаган.

Шунингдек, Бошқарув раисининг ўринбосари Аброр Қодирович Тургуновнинг ҳам ваколатлари тугатилди.

«Пойтахтбанк» 2019 йилда ипотека дастурлари ва уй-жой қурилиши лойиҳаларини, шу жумладан арзон уй-жой дастурларини молиялаштириш мақсадида ташкил этилган. Дастлаб унинг устав капитали тўлиқ Тошкент шаҳар ҳокимлигига тегишли бўлган.

2024 йил июнь ойида Давлат активларини бошқариш агентлиги банкни хусусийлаштириш бўйича Бирлашган Араб Амирликларидаги Bond Investments Limited компанияси билан келишувга эришган. Ушбу компания давлат улушини 10 миллион АҚШ долларига сотиб олган.

Кейинчалик хусусийлаштириш жараёни якунлангани эълон қилинган.

Давлат реестри маълумотларига кўра, Bond Investments Limited банкнинг ягона эгасига айланган ва юридик шахснинг расмий номига «хорижий компания» деган қўшимча киритилган.