Португалия ва Швейцария ЖЧнинг 1/8 финалига чиқди

Тошкент, Ўзбекистон (UzDaily.uz) — Португалия ва Швейцария терма жамоалари футбол бўйича жаҳон чемпионати 1/16 финал босқичида ғалаба қозониб, мусобақанинг кейинги босқичига йўл олди.

Португалия терма жамоаси Хорватияни 2:1 ҳисобида мағлуб этиб, учрашув давомида ўтказиб юборилган голдан кейин ўйин тақдирини ўз фойдасига ўзгартира олди. Ҳисобни 53-дақиқада Хорватия ярим ҳимоячиси Иван Перишич очди. Шундан сўнг португалияликлар жавоб қайтариб, 68-дақиқада Криштиану Роналду пенальтини аниқ амалга оширди. Ғалаба голини эса Гонсалу Рамуш қўшимча вақтнинг 90+4-дақиқасида киритди.

Қайд этилишича, мазкур ғалаба Португалия терма жамоаси учун сўнгги 60 йил ичида жаҳон чемпионатларидаги илк иродавий ғалаба бўлди. Бундан аввал жамоа учрашув давомида ҳисобда ортда қолиб туриб, 1966 йилги жаҳон чемпионати чорак финалида КХДР устидан 5:3 ҳисобида ғалаба қозонган эди.

1/8 финалда Португалия Испания терма жамоасига қарши майдонга тушади. Учрашув 6 июль куни бўлиб ўтади.

Швейцария терма жамоаси ҳам Жазоир устидан 2:0 ҳисобида ғалаба қозониб, 1/8 финалга чиқишни таъминлади. Учрашув Ванкувер шаҳрида бўлиб ўтди.

Биринчи голни 10-дақиқада Жоан Манзамбининг узатмасидан кейин Брил Эмболо киритди. Танаффусдан сўнг, 46-дақиқада Дан Ндойе швейцарияликларнинг устунлигини мустаҳкамлади.

Швейцарияликлар ўйин давомида ташаббусни қўлда ушлаб турди ва яна бир нечта хавфли вазиятлар яратди, аммо ҳисобни ошира олмади. Жазоир терма жамоаси эса рақиб дарвозаси олдида жиддий хавф туғдира олмай, мусобақадаги иштирокини якунлади.