Тошкент, Ўзбекистон (UzDaily.uz) — «Ўзбекнефтгаз» Хитойнинг BGP ва INOVA компаниялари билан ҳамкорликдаги лойиҳаларнинг амалга оширилиши ва ҳамкорликни кенгайтириш истиқболларини муҳокама қилди. Бу ҳақда «Ўзбекнефтгаз» ахборот хизмати хабар берди.
Учрашувни компания бошқаруви раисининг биринчи ўринбосари Сухроб Ҳамроев ўтказди. Иштирокчилар ҳамкорликдаги ишларнинг жорий ҳолати ва уни янада ривожлантиришнинг мумкин бўлган йўналишларини кўриб чиқдилар.
Томонлар қўшма лойиҳалар доирасидаги сейсмик қидирув ишларига алоҳида эътибор қаратдилар. Режалаштирилган вазифаларни белгиланган муддатларда ва тегишли сифат даражасида бажариш зарурлиги таъкидланди.
Шунингдек, 2026 йил охирига қадар иш суръатларини жадаллаштириш зарурати муҳокама қилинди.
Музокараларнинг яна бир мавзуси геофизика ускуналарини ишлаб чиқариш ва етказиб бериш бўлди. Томонлар эришилган келишувлар доирасида техникаларни тўлиқ ҳажмда ва ўз вақтида етказиб бериш муҳимлигини таъкидладилар.
Учрашув якунлари бўйича компаниялар вакиллари амалдаги келишувларни ўз вақтида ва сифатли бажариш, шунингдек, ҳамкорликни янги йўналишлар ҳисобига кенгайтиришга тайёр эканликларини билдирдилар.
Томонлар нефть-газ соҳаси учун замонавий технологияларни жорий этиш ва мутахассислар тайёрлаш йўналишларида ҳамкорликни ривожлантириш истиқболларини ҳам алоҳида қайд этдилар.