Ўзбекистонлик ҳунармандлар Homo Faber'да ўз ишларини намойиш этишди
Тошкент, Ўзбекистон (UzDaily.uz) — Ўзбекистонлик ҳунармандларнинг ишлари Венецияда ўтказилаётган замонавий бадиий ҳунармандчиликка бағишланган Homo Faber 2026: An Island of Light халқаро кўргазмасида намойиш этилмоқда. Экспозицияда 70 мамлакат вакиллари иштирок этмоқда, кўргазмада жами 700 дан ортиқ асар тақдим этилган. Бу ҳақда Ўзбекистон Маданият ва санъатни ривожлантириш жамғармаси хабар берди.
Ўзбекистон экспозициясидан Санжар Кубаев ва Алишер Назировнинг Moonjars номли керамик асарлари, шунингдек, Шавкиддин Камоловнинг бадиий қайчилари ўрин олган.
Ўзбекистон кўргазманинг таълим дастурида ҳам иштирок этмоқда. Диёробек Абдуллаев ва Сабина Жўраева Homo Faber 2026 доирасида Young Ambassadors дастурининг медиаторлари сифатида қатнашмоқда.
Ўзбекистонлик ҳунармандларнинг ушбу тадбирдаги иштироки Ўзбекистон Маданият ва санъатни ривожлантириш жамғармасининг Michelangelo Foundation билан ҳамкорлигининг давоми бўлди. Ташкилотлар ўртасидаги ҳамкорлик 2023 йилда Бухорода Homo Faber Guide’нинг Ўзбекистонга бағишланган бўлимини ишга туширишдан бошланган.
Ўзбекистоннинг иштирок дастури доирасида Мадина Қосимбоева томонидан анъанавий сўзана каштачилигига бағишланган маҳорат дарслари ҳам ўтказилади.
Бу йил Homo Faber 70 мамлакатдан 500 дан ортиқ усталарни бирлаштириб, замонавий бадиий ҳунармандчиликнинг 700 дан зиёд асарини намойиш этмоқда.
