Тошкент, Ўзбекистон (UzDaily.uz) — Ўзбекистондан экспорт юк ташиш хизматларига талаб ортиб бормоқда.
2026 йилнинг учинчи чорагида хорижга юк етказиб бериш бўйича буюртмалар сони ўтган йилнинг шу даврига нисбатан 29 фоизга ошди, ташиш тарифлари эса 10 фоизга кўтарилди. Бу ҳақда ATI.SU логистика сервиси ҳисоботида маълум қилинган.
Тўққиз ой давомида экспорт юк ташиш бўйича буюртмалар сони 11 фоизга кўпайди. Ижобий динамика йилнинг учала чорагида ҳам сақланиб қолди. Энг сезиларли ўсиш Беларусь йўналишида қайд этилди: ушбу мамлакатга юк етказиб беришга бўлган талаб 80 фоизга ошди. Россияга юк ташиш бўйича буюртмалар сони эса чоракка кўпайди.
Импорт юк ташиш бозоридаги динамика нисбатан беқарор бўлди. Йил бошидан буён барча йўналишлар бўйича буюртмалар сони 16 фоизга ошган бўлса-да, учинчи чоракда бу кўрсаткич 8 фоизга пасайди.
Июль ва август ойларида фаоллик сезиларли даражада камайди, бироқ сентябрь ойида импорт юк ташиш бўйича буюртмалар сони 39 фоизга ошди.
Россия йўналишида кузнинг биринчи ойида буюртмалар сони қарийб бир ярим баравар кўпайди. Шунга қарамай, аввалги икки ойда фаоллик пасайгани сабабли ушбу йўналиш бўйича чораклик кўрсаткич 4 фоизга қисқарди. Импорт юк ташиш тарифлари йил давомида атиги 2 фоизга ошди.
Мамлакат ичидаги юк ташиш хизматларида ҳам ижобий динамика кузатилди. Учинчи чоракда Ўзбекистон ҳудуди бўйлаб юк етказиб бериш бўйича буюртмалар сони иккинчи чоракка нисбатан 12 фоизга кўпайди.
ATI.SU маълум қилишича, статистик кўрсаткичларга нафақат бозордаги вазият, балки платформа аудиториясининг кенгайиши ҳам таъсир кўрсатмоқда. Ўзбекистонлик ташувчилар ва буюртмачилар қўлда бажариладиган жараёнлардан рақамли хизматларга тобора фаол ўтмоқда.
ATI.SU’нинг Ўзбекистондаги ваколатхонаси раҳбари Фарид Воҳидов Россия йўналишида ёзда фаоллик пасайишини, айниқса, Россиядан импортга таъсир кўрсатган ёқилғи инқирози билан боғлади.
Унинг сўзларига кўра, сентябрь ойида дизель ёқилғиси билан боғлиқ вазият яхшиланди. Бу эса мазкур йўналишда талабнинг кескин ўсишини кўп жиҳатдан изоҳлайди.
