Ўзбекистонда «сирли мижозлар» умра саёҳатларини ташкил этувчи туроператорларни текширишни бошлайди

Тошкент, Ўзбекистон (UzDaily.uz) — Ўзбекистонда умра саёҳатларини ташкил этувчиларни «сирли мижозлар» ёрдамида текшириш амалиёти жорий этилади. Бу ҳақда Дин ишлари бўйича қўмита матбуот хизмати хабар берди.

Маълумотларга кўра, қўмита ходимлари оддий мижоз сифатида туроператорларга мурожаат қилиб, лицензия мавжудлиги, сафар шартлари, нархи ва тўлов усулларини баҳолайди. Зарур ҳолларда «сохта» мижозлар яширин аудио ёки видео ёзув олишлари мумкин.

Бундай чоралар ноқонуний ташкилотчиларни тез фурсатда аниқлаш ва зиёратчилар ҳуқуқлари бузилишининг олдини олишга хизмат қилади. Ноқонуний фаолият тасдиқланганда, материаллар ҳуқуқни муҳофаза қилувчи органларга юборилади ёки расмий текширув ўтказиш учун асос бўлади.