Тошкент, Ўзбекистон (UzDaily.uz) — Ўзбекистон Транспорт вазирлиги ҳаво кемалари бортида ўзини тутиш қоидаларини бузганлик учун маъмурий жавобгарликни кучайтиришни назарда тутувчи қонун лойиҳасини ишлаб чиқди.
Ҳужжатда самолёт командири ёки ваколатли экипаж аъзосининг кўрсатмаларини такроран бажармаганлик учун алоҳида жарималар белгилаш таклиф этилган.
Лойиҳага мувофиқ, Ўзбекистоннинг Маъмурий жавобгарлик тўғрисидаги кодекси 117-моддасини янги таҳрирда баён этиш таклиф қилинмоқда.
Йўловчи ҳаво кемаси командирининг ёки унинг номидан иш юритувчи экипаж аъзосининг бортдаги хулқ-атвор қоидаларига риоя этиш билан боғлиқ кўрсатмаларини бажармаганлиги учун базавий ҳисоблаш миқдорининг (БҲМ) 5 бараваридан 10 бараваригача, яъни 2,2 миллион сўмдан 4,4 миллион сўмгача жарима қўллаш назарда тутилган.
Агар шунга ўхшаш ҳуқуқбузарлик маъмурий жазо қўлланилганидан кейин бир йил ичида такроран содир этилса, жарима 15 БҲМдан 20 БҲМгача, яъни 6,6 миллион сўмдан 8,8 миллион сўмгача бўлиши мумкин.
Ҳозирги вақтда Маъмурий жавобгарлик тўғрисидаги кодекснинг 117-моддасида ҳаво кемаси бортида бўлган шахслар командир ёки унинг номидан иш юритувчи экипаж аъзосининг кўрсатмаларини бажармаганлиги учун 5 БҲМдан 10 БҲМгача жарима белгиланган. Бироқ бир йил ичида такроран содир этилган ҳуқуқбузарлик учун алоҳида жазо назарда тутилмаган.
Қонун лойиҳасида таъкидланишича, таклиф этилаётган ўзгартишлар парвозлар хавфсизлигини ошириш ва фуқаро авиацияси қоидаларига риоя этмаганлик учун жавобгарликни кучайтиришга қаратилган.
Лойиҳа бўйича жамоатчилик муҳокамаси 24 октябрга қадар давом этади.
