Ўзбекистонда 2026–2030 йилларга мўлжалланган таълим тизими муҳокама қилинди
Тошкент, Ўзбекистон (UzDaily.uz) — Ўзбекистон Олий таълим, фан ва инновациялар вазирлигида 3 сентябрь куни давлат бошқаруви ва таълим ислоҳотлари масалалари бўйича халқаро эксперт Жонатан Слейтер билан учрашув бўлиб ўтди. Муҳокамаларда Мактабгача ва мактаб таълими вазирлиги вакиллари ҳам иштирок этди.
Слейтер Буюк Британия Таълим департаментининг собиқ доимий котиби бўлиб, давлат бошқаруви ва таълим ислоҳотлари соҳасида 35 йилдан ортиқ тажрибага эга. Ҳозирда у Ўзбекистон Президенти маслаҳатчиси Сума Чакрабартининг давлат бошқаруви ва маъмурий ислоҳотлар масалалари бўйича консультанти сифатида фаолият юритади.
Учрашув давомида Ўзбекистонда таълим соҳасида амалга оширилаётган ўзгаришлар ҳақида маълумот берилди. Улар таълим тизимининг сифати ва самарадорлигини ошириш, халқаро стандартларни жорий этиш ҳамда унинг инновацион салоҳиятини ривожлантиришга қаратилган.
Иштирокчилар аҳолининг олий таълим билан қамрови ошгани, таълим дастурларини халқаро аккредитациядан ўтказиш жараёнлари жадаллашгани ва мамлакатнинг инновацион салоҳиятини мустаҳкамлаш бўйича чора-тадбирларни таъкидладилар. Шунингдек, Ўзбекистон Глобал инновациялар индексида 79-ўринни эгаллаб, Марказий Осиё давлатлари орасида етакчилик мавқеини сақлаб қолгани қайд этилди.
Томонлар мактабгача, мактаб ва олий таълим ўртасидаги узвийликни таъминлаш масаласига алоҳида эътибор қаратдилар. Жумладан, мактабгача таълимдан 9-синфни тамомлагунга қадар бўлган даврни қамраб оладиган узлуксиз касбга йўналтириш тизимини жорий этиш масаласи муҳокама қилинди.
Учрашув иштирокчиларининг фикрича, бундай тизимни ривожлантириш ёшларни келажакдаги касбий фаолиятга тайёрлаш ҳамда таълим ва касбий йўналишларни эртароқ белгилаш учун муҳим аҳамиятга эга.
Асосий мавзулардан бири 2026–2030 йилларда таълим тизимини ривожлантиришнинг устувор вазифалари ва халқаро ҳамкорликнинг истиқболли йўналишлари бўлди. Томонлар таълим сифатини таъминлаш механизмларини такомиллаштириш, илғор халқаро тажрибани ҳисобга олган ҳолда аккредитация тизимини ривожлантириш ва Ўзбекистон олий таълим ташкилотларининг халқаро рақобатбардошлигини ошириш масалаларини муҳокама қилдилар.
Бундан ташқари, хорижлик талабаларни Ўзбекистон олий таълим муассасаларига янада кўпроқ жалб қилиш ҳамда мамлакатнинг халқаро таълим маконидаги нуфузини ошириш имкониятлари кўриб чиқилди. Шунингдек, Ўзбекистонда дунёдаги етакчи олий таълим ташкилотларининг филиалларини ташкил этиш истиқболи муҳокама қилинди.
Учрашув давомида халқаро тажрибани ўрганиш ва илғор ёндашувларни миллий таълим тизимига мослаштириш муҳимлиги таъкидланди. Иштирокчилар таълим сифатини ва бошқарув самарадорлигини ошириш мақсадида ҳамкорликни изчил давом эттириш зарурлигини ҳам қайд этдилар.
Учрашув якунида белгиланган устувор йўналишлар бўйича ҳамкорликни мустаҳкамлаш, таълим тизимини янада такомиллаштириш ва истиқболда белгиланган вазифаларни амалга ошириш бўйича фикр ва таклифлар алмашилди.
