Тошкент, Ўзбекистон (UzDaily.uz) — Ўзбекистон Viasat, Amazon Leo, Ericsson ва 77 Construction USA Corp. компаниялари вакиллари билан телекоммуникация инфратузилмасини ривожлантириш, сунъий йўлдош орқали интернет ва мобил алоқа тармоқларини такомиллаштириш масалаларини муҳокама қилди.
Телекоммуникацияларни тартибга солиш агентлиги директори Дилшод Курёзовнинг компаниялар вакиллари билан учрашувлари Самарқанд шаҳрида C5+1 саммити доирасида бўлиб ўтди.
Viasat компаниясининг стратегик ҳамкорлик ва бозорларни ривожлантириш бўйича глобал раҳбари Майкл Хауэллс билан музокараларда сунъий йўлдош алоқаси имкониятларини кенгайтиришга асосий эътибор қаратилди. Томонлар авиация, давлат сектори ва олис ҳудудларда замонавий телекоммуникация хизматларини тақдим этиш истиқболларини кўриб чиқди.
Шунингдек, анъанавий тармоқлар қамрови чекланган жойларда барқарор интернет алоқасини таъминлаш, сунъий йўлдош технологияларини мавжуд телекоммуникация инфратузилмасига интеграция қилиш ва халқаро тажрибадан фойдаланиш масалалари муҳокама қилинди.
Amazon Leo компаниясининг Марказий Осиё ва Шарқий Европада тартибга солиш масалалари бўйича раҳбари Дмитрий Ветлугин билан учрашувда сунъий йўлдош технологиялари ёрдамида юқори тезликдаги, кечикиш даражаси паст кенг полосали интернетни тақдим этиш имкониятлари кўриб чиқилди.
Анъанавий ер усти телекоммуникация тармоқлари мавжуд бўлмаган олис ҳудудларга алоҳида эътибор қаратилди.
Томонлар аҳоли ва бизнеснинг интернетдан фойдаланиш имкониятларини кенгайтириш, рақамли инфратузилмани ривожлантириш ҳамда электрон давлат хизматлари самарадорлигини ошириш масалаларини ҳам муҳокама қилди.
Ericsson компаниясининг Европа, Яқин Шарқ ва Африка бўйича вице-президенти, шунингдек, Жанубий Европа ва Евроосиёда мижозлар билан ишлаш бўлинмаси раҳбари Андреа Миссори билан музокараларда мобил алоқа тармоқларини модернизация қилиш истиқболлари кўриб чиқилди.
Томонлар 4G ва 5G технологияларини жорий этиш, тармоқларнинг ядро қисмини такомиллаштириш ва булутли дастурий ечимларни ривожлантириш бўйича фикр алмашди. Бундан ташқари, корхоналар учун хусусий симсиз тармоқларни яратиш ва телекоммуникация инфратузилмасини модернизация қилишда замонавий технологиялардан фойдаланиш масалалари муҳокама қилинди.
77 Construction USA Corp. компаниясининг Шарқий Европа ва Марказий Осиё бўйича директори Жон Докинс билан ҳам алоҳида учрашув бўлиб ўтди. Музокаралар киберхавфсизлик, малакали мутахассислар тайёрлаш ва энергетика тизимларини ривожлантириш масалаларига бағишланди.
Учрашувлар якунлари бўйича муайян келишувлар ёки лойиҳаларни амалга ошириш муддатлари ҳақида маълумот берилмаган.
