Ўзбекистон ва Хитой офтальмология соҳасида ҳамкорликни кенгайтирмоқда

Тошкент, Ўзбекистон (UzDaily.uz) — Ўзбекистон ва Хитой офтальмология соҳасида ҳамкорликни кенгайтирмоқда. Ҳамкорлик доирасида мутахассислар ўртасида тажриба алмашиш ва қўшма жарроҳлик амалиётларини ўтказиш йўлга қўйилган. Бу ҳақда Ўзбекистон Соғлиқни сақлаш вазирлиги матбуот хизмати хабар берди.

2019 йилдан буён «Бир макон, бир йўл» дастури доирасида Хитой шифохоналари ва компаниялари билан ҳамкорликда Ўзбекистонда ижтимоий ҳимояга муҳтож 4 мингдан ортиқ катаракта билан касалланган фуқарога жарроҳлик ёрдами кўрсатилди.

Айни пайтда «Нур ва эзгулик улаш» акцияси олтинчи марта ўтказилмоқда. Унинг очилиш маросими Республика ихтисослаштирилган кўз микрохирургияси илмий-амалий тиббиёт марказида бўлиб ўтди.

Акция доирасида 150 нафар беморнинг кўриш қобилиятини тиклаш режалаштирилган. Тадбир икки давлат ўртасида ривожланиб бораётган тиббий ҳамкорлик доирасида Хитой томони иштирокида ўтказилмоқда.

Маросим давомида Ўзбекистон соғлиқни сақлаш вазири маслаҳатчиси Элмира Баситханова Хитойнинг «Asia-Europe International Materials Trading Center» компанияси раҳбари Чжан Сюньпинга «Ўзбекистон Республикаси соғлиқни сақлаш аълочиси» кўкрак нишонини топширди.

Ўзбекистонлик ва хитойлик офтальмологлар ҳамкорлиги замонавий диагностика ва даволаш усуллари бўйича мунтазам тажриба алмашиш, шунингдек, қўшма жарроҳлик амалиётларини ўтказишни ўз ичига олади.

Ўзбекистон Соғлиқни сақлаш вазирлиги матбуот хизмати акциянинг ўтказилиши ҳақидаги видеолавҳани яқин вақт ичида тақдим этишини маълум қилди.