Ўзбекистон ва Қирғизистон Ҳукумат делегациялари ишчи гуруҳларининг учрашуви бўлиб ўтди

Тошкент, Ўзбекистон (UzDaily.uz) -- 2017 йилнинг 21-26 май кунлари Қирғизистоннинг Жалол-Обод шаҳрида Ўзбекистон Республикаси ва Қирғизистон Республикаси Ҳукумат делегацияларининг Ўзбекистон-Қирғизистон Давлат чегарасини делимитация ва демаркация қилиш бўйича ишчи гуруҳлари учрашуви бўлиб ўтди. Бу ҳақда ЎзР ТИВ Матбуот хизмати хабар беради.

Учрашув доирасида Ўзбекистон-Қирғизистон чегараси участкаларида камерал ишлар олиб борилди, шунингдек, Ўзбекистон Республикасининг Андижон вилояти билан Қирғизистоннинг Ўш вилояти туташган ҳудудлардаги Ўзбекистон-Қирғизистон давлат чегарасида қўшма топографик ва ер тузиш ишлари бўлиб ўтди.

Музокаралар давомида Ўзбекистон-Қирғизистон чегарасини делимитация қилиш бўйича оралиқ Шартнома лойиҳаси тайёрлаш масалалари ҳам муҳокама қилинди.

Музокаралар якунига кўра Баённома имзоланди.

Учрашув конструктив ва дўстона руҳда ўтди.