Ўзбекистон ва Норвегия уч йиллик ядровий хавфсизлик лойиҳасини бошлади

Тошкент, Ўзбекистон (UzDaily.uz) — Ўзбекистон ва Норвегия радиация ва ядро хавфсизлиги соҳасидаги норматив-ҳуқуқий базани такомиллаштиришга қаратилган янги уч йиллик лойиҳани амалга оширишни бошлади, деб хабар бермоқда “Дунё” АА мухбири.

Лойиҳа Норвегиянинг ядро соҳасидаги ҳаракатлар режаси доирасида молиялаштирилиб, Ўзбекистон Саноат, радиация ва ядро хавфсизлиги қўмитаси ҳамда Радиация ва ядро хавфсизлиги илмий-техника маркази билан ҳамкорликда амалга оширилмоқда.

Ҳамкорликнинг асосий йўналишлари миллий норматив-ҳуқуқий ҳужжатларни такомиллаштириш, радиация ва ядро хавфсизлиги соҳасида давлат томонидан тартибга солиш тизимини янада ривожлантириш, шунингдек, илғор халқаро тажрибани ўрганиш ва амалиётга жорий этишни ўз ичига олади.

Норвегия Радиация ва ядро хавфсизлиги бошқармаси (DSA) маълумотига кўра, Норвегия делегацияси Тошкентга ташрифи доирасида Ўзбекистоннинг тегишли давлат идоралари вакиллари билан қатор учрашувлар ўтказилган.

Унда лойиҳанинг мақсад ва устувор йўналишлари, шунингдек, мамлакатда радиация ва ядро хавфсизлигини таъминлаш миллий тизимини янада мустаҳкамлашга қаратилган амалий вазифалар муҳокама қилинган.