Ўзбекистон ва Монголия савдо-логистика ҳамкорлигини кенгайтиради
Тошкент, Ўзбекистон (UzDaily.uz) — Ўзбекистон ва Монголия савдо-иқтисодий ҳамда транспорт-логистика ҳамкорлигини янада ривожлантириш, жумладан, янги халқаро йўналишларни яратиш ва трансчегаравий жараёнларни рақамлаштириш масалаларини муҳокама қилди. Бу ҳақда Ўзбекистон Инвестициялар, саноат ва савдо вазирлиги хабар берди.
Вазирликда Ривожланаётган, денгизга чиқиш имконияти бўлмаган мамлакатлар учун Халқаро таҳлилий марказ ижрочи директори Дамдин-Од Дулгуун иштирокида музокаралар ўтказилди.
2025 йил якунларига кўра, Ўзбекистон ва Монголия ўртасидаги товар айирбошлаш ҳажми 51,8 миллион долларни ташкил этди. Томонлар, шунингдек, 2026 йил май ойида икки мамлакатнинг 70 дан зиёд компанияси иштирокида ўтказилган бизнес-форум натижаларини қайд этди.
Учрашувда юқори қўшилган қийматга эга маҳсулотлар ишлаб чиқаришни ривожлантириш ва барқарор таъминот занжирларини шакллантиришга алоҳида эътибор қаратилди. Шунингдек, янги халқаро транспорт йўналишларини ташкил этиш, савдо тартиб-таомилларини соддалаштириш ва трансчегаравий жараёнларни рақамлаштириш имкониятлари муҳокама қилинди.
Томонлар Хитой–Қирғизистон–Ўзбекистон темир йўл лойиҳасининг истиқболларини ҳам кўриб чиқди. Учрашув иштирокчилари баҳосига кўра, лойиҳанинг амалга оширилиши Монголиянинг Ўзбекистон, Марказий Осиёнинг бошқа давлатлари ва Жанубий Кавказ мамлакатлари билан интермодал транспорт алоқаларини ривожлантириш учун қўшимча имкониятлар яратади.
Музокаралар якунида ЦАРЭСнинг 25-вазирлар конференциясини тайёрлаш ва ўтказиш доирасида ҳамкорлик қилиш бўйича келишувга эришилди. Тадбир 2026 йил октябрь ойида Улан-Батор шаҳрида ўтказилиши режалаштирилган.
