Ўзбекистон ва JICA Афғонистон бўйича лойиҳаларни муҳокама қилди

Тошкент, Ўзбекистон (UzDaily.uz) — Ўзбекистон Президентининг Афғонистон бўйича махсус вакили Исматулла Иргашев Япониянинг JICA агентлиги Жанубий Осиё департаменти бош директори Тецуя Ямада билан учрашув ўтказди. Учрашувда томонлар Афғонистонни ижтимоий-иқтисодий ривожлантиришга қаратилган қўшма лойиҳаларни амалга ошириш истиқболларини муҳокама қилди.

Музокаралар давомида таъкидланганидек, Афғонистон аҳолисини қўллаб-қувватлаш, мамлакат иқтисодиётининг асосий тармоқлари ва ижтимоий инфратузилмасини ривожлантиришга қаратилган ташаббусларни ишга тушириш имкониятларига алоҳида эътибор қаратилди.

Япон томони вакиллари Ўзбекистоннинг Афғонистон билан ҳамкорликдаги прагматик ёндашувига юқори баҳо берди. JICA вакиллари шунингдек Термиз шаҳрида яратилган инфратузилманинг аҳамиятини қайд этиб, ундан халқаро гуманитар ва ижтимоий лойиҳаларни амалга ошириш платформаси сифатида фойдаланиш мумкинлигини таъкидлади.

Учрашув якунлари бўйича япон томони таълим, соғлиқни сақлаш, қишлоқ хўжалиги, хусусий секторни ривожлантириш, шунингдек, наркотик моддаларнинг ноқонуний айланмасига қарши кураш соҳаларидаги дастурларни илгари суриш учун Термиз имкониятларидан фойдаланишга қизиқиш билдирди.

Томонлар бундай ташаббусларни амалга ошириш Афғонистондаги ижтимоий-иқтисодий вазиятни яхшилаш ва афғон халқи фаровонлигини оширишга хизмат қилишини таъкидлади.