Ўзбекистон ва Жазоир сиёсий мулоқотни мустаҳкамламоқда

Тошкент, Ўзбекистон (UzDaily.uz) — Ўзбекистон ташқи ишлар вазири Бахтиёр Саидов Жазоирда Жазоир Халқ Демократик Республикаси ташқи ишлар, хориждаги миллий ҳамжамият ва Африка ишлари вазири Аҳмад Аттаф билан учрашди.

Музокаралар 11 июнь куни тор ва кенгайтирилган форматларда бўлиб ўтди.

Томонлар сиёсий мулоқотни фаоллаштириш, савдо-иқтисодий ва инвестициявий ҳамкорликни кенгайтириш, икки мамлакат ўртасидаги маданий-гуманитар алоқаларни мустаҳкамлаш масалаларини батафсил муҳокама қилишди.

Учрашув давомида Ўзбекистон Жазоирни Африка қитъасида муҳим ва истиқболли шерик сифатида кўриши ва икки томонлама муносабатларда ҳали фойдаланилмаган салоҳият катта эканлиги таъкидланди.

Юқори даражадаги мунтазам алоқалар, қўшма лойиҳаларни ишлаб чиқиш ва БМТ ва Қўшилмаслик ҳаракати каби халқаро ташкилотлар доирасида ўзаро ҳамкорлик зарурлигига алоҳида эътибор қаратилди.

Томонлар, шунингдек, Яқин Шарқдаги вазиятни ўз ичига олган долзарб минтақавий ва халқаро масалалар бўйича фикр алмашдилар.

Вазиятнинг янада кескинлашишига йўл қўймаслик ва халқаро барқарорликни мустаҳкамлаш учун вазминлик, мулоқот ва дипломатик саъй-ҳаракатларнинг муҳимлиги таъкидланди.