Тошкент, Ўзбекистон (UzDaily.uz) — Ўзбекистон ва Гонконг инвестициявий ҳамда савдо-иқтисодий ҳамкорликни кенгайтириш, жумладан, қўшма корхоналар ташкил этиш, компанияларнинг янги бозорларга чиқиши ва ишбилармонлик алоқаларини ривожлантириш истиқболларини муҳокама қилди.
Ўзбекистон Савдо-саноат палатаси раиси маслаҳатчиси Жамиль Максуди Гонконг ишбилармон доиралари делегацияси билан учрашув ўтказди. Делегацияга Гонконг Бирлашган савдо-саноат ассоциацияси раисининг ўринбосари Фан Цзыкан бошчилик қилди.
Делегация таркибидан Гонконг ва Гуандун провинцияси савдо-саноат бирлашмалари раҳбарлари, шунингдек, инвестициялар, юқори технологиялар ва умумий овқатланиш соҳаларида фаолият юритувчи компаниялар вакиллари ўрин олди.
Делегация раҳбарининг айтишича, 10 мингдан ортиқ корхонани бирлаштирган федерация «Бир макон, бир йўл» ташаббуси доирасида Марказий Осиёдаги фаолиятини кенгайтиришни режалаштирмоқда. Бунда Ўзбекистон устувор йўналишлардан бири сифатида танланган.
Гонконг вакиллари Ўзбекистонда компаниялар ташкил этиш ҳамда меҳмонхона бизнеси, умумий овқатланиш ва таълим лойиҳаларига инвестиция киритишдан манфаатдор эканини билдирди. Шунингдек, дронлар ишлаб чиқаришга ихтисослашган компания SKD технологияси асосидаги бутловчи қисмлардан фойдаланган ҳолда мамлакатда йиғув корхонасини ташкил этиш имкониятини кўриб чиқмоқда.
Музокараларда йирик ўзбекистонлик компаниялар ва банкларнинг Гонконг фонд биржасига чиқиши масаласига ҳам алоҳида эътибор қаратилди. Шу муносабат билан Ўзбекистон молия сектори ва йирик корхоналари вакиллари иштирокида Гонконгга бизнес-миссия ташкил этиш таклиф қилинди.
Томонлар, шунингдек, Ўзбекистон, Гонконг ва Хитой компаниялари учун қўшма электрон B2B платформасини яратиш масаласини муҳокама қилди.
Гонконг ишбилармон доиралари вакиллари амалдаги Гонконг ва Сиань савдо платформаларида ўзбекистонлик корхоналар учун алоҳида бўлимлар очишга тайёрлигини билдирди.
Делегация 2026 йил 29 ноябрдан 5 декабрга қадар ўтказилиши режалаштирилган «New Uzbekistan: Crossroads of Global Markets» халқаро форумида иштирок этишга таклиф қилинди.
Учрашув якунида томонлар қўшма ишчи гуруҳ тузиш ва ишбилармон делегациялар алмашинувини давом эттиришга келишиб олди.
Ўзбекистон Савдо-саноат палатаси Гонконг компанияларига маҳаллий ҳамкорларни топиш ва тегишли давлат органлари билан алоқалар ўрнатишда кўмаклашишга тайёрлигини тасдиқлади.
