Тошкент, Ўзбекистон (UzDaily.uz) — Ўзбекистон ва БМТнинг Озиқ-овқат ва қишлоқ хўжалиги ташкилоти (ФАО) қўшма лойиҳаларни давом эттириш ва аграр сектордаги ташаббусларни ривожлантириш масалаларини муҳокама қилди.
Бу ҳақда Ўзбекистон қишлоқ хўжалиги вазири Иброҳим Абдураҳмоновнинг ФАО бош директори Цюй Дунъюй билан учрашувида сўз борди.
Томонлар қишлоқ хўжалигини ривожлантиришга қаратилган ҳамкорлик истиқболлари ва амалдаги лойиҳаларни амалга ошириш жараёни юзасидан фикр алмашди.
Учрашувда Ўзбекистоннинг минтақадаги ўрни ва мамлакатда амалга оширилаётган ислоҳотларга алоҳида эътибор қаратилди. Иштирокчилар халқаро аҳамиятга эга масалаларни кўтариб чиқаётган янги авлод етакчилари шаклланаётганини, шунингдек, хотин-қизларни қўллаб-қувватлаш ва уларнинг ўз салоҳиятини рўёбга чиқариш имкониятларини кенгайтириш бўйича кўрилаётган чораларни таъкидлади.
Аграр сектордаги хотин-қизлар ютуқларига мисол сифатида «Қува анори» агрофирмаси раҳбари Мастурахон Сайфуддинованинг фаолияти қайд этилди.
Унинг муваффақиятлари мамлакатда яратилаётган шарт-шароитлар, имкониятларнинг кенгайтирилиши ва хотин-қизларни қўллаб-қувватлаш чораларининг натижаси сифатида баҳоланди. Учрашувда тақдим этилган маълумотларга кўра, Сайфуддинова юзлаб номзодлар орасидан саралаб олинган ва юксак эътирофга сазовор бўлган.
Томонлар қўшма лойиҳаларни изчил давом эттириш зарурлигини таъкидлади.
Шунингдек, улар амалга оширилаётган ислоҳотлар келгуси ўн йил давомида Ўзбекистондаги ўзгаришларнинг кейинги босқичи учун асос бўлишига ишонч билдирди.
