Тошкент, Ўзбекистон (UzDaily.uz) — Ўзбекистон Кадастр агентлиги Франциянинг Dassault Systèmes компанияси ва Франция элчихонасининг иқтисодий бўлими вакиллари билан шаҳар инфратузилмаси соҳасида рақамли технологияларни ривожлантириш масалалари юзасидан музокаралар ўтказди.
Учрашув 27 октябрь куни бўлиб ўтди. Унда Dassault Systèmes компаниясининг Марказий Осиё бўйича раҳбари Мишель Латтер иштирок этди.
Томонлар шаҳарларнинг рақамли эгизакларини яратиш соҳасида идоралараро ҳамкорликни йўлга қўйиш ва тажриба алмашиш истиқболларини муҳокама қилди. Миллий фазовий маълумотлар инфратузилмасини ривожлантиришга қаратилган лойиҳаларга алоҳида эътибор қаратилди.
Бундан ташқари, иштирокчилар халқаро экспертларни жалб қилган ҳолда малака ошириш дастурлари ва ўқув тренингларини ташкил этиш имкониятларини кўриб чиқди.
Ҳамкорликда амалга оширилиши мумкин бўлган лойиҳалар тафсилотлари ва уларни амалга ошириш муддатлари ҳозирча маълум қилинмаган.
