Ўзбекистон терма жамоаси Осиё кубогида икки олтин олди

Тошкент, Ўзбекистон (UzDaily.uz) — Ўзбекистон терма жамоаси вакиллари Таиланднинг Бангкок шаҳрида старт олган велотрек бўйича Осиё кубоги босқичининг биринчи кунида икки медални қўлга киритди. Бу ҳақда Ўзбекистон Миллий олимпия қўмитаси хабар берди.

Мусобақада Сергей Ростовцев ва Самира Исмоилова ғолибликни қўлга киритди. Сергей Ростовцев «скрэтч» йўналишида олтин медалга сазовор бўлди.

Ўзбекистон терма жамоасига яна бир олтин медални индивидуал таъқиб пойгасида ғолиб бўлган Самира Исмоилова тақдим этди.

Шу тариқа, мусобақанинг биринчи куни якунларига кўра, Ўзбекистон терма жамоаси икки олтин медални қўлга киритди.