Ўзбекистон ЖЧда Колумбияга қарши ўйинни мағлубият билан бошлади

Тошкент, Ўзбекистон (UzDaily.uz) — Ўзбекистон терма жамоаси футбол бўйича жаҳон чемпионатининг гуруҳ босқичи биринчи турида Колумбия терма жамоасига 1:3 ҳисобида мағлуб бўлди. Учрашув Мехико шаҳрида бўлиб ўтди ва Ўзбекистон жамоаси учун жаҳон чемпионатлари тарихидаги дебют ўйин бўлди.

Колумбия терма жамоаси сафида голларга 40-дақиқада Даниэль Муньос, 65-дақиқада Луис Диас ҳамда иккинчи бўлимга қўшиб берилган вақтда Хаминтон Кампас муаллифлик қилди. Ўзбекистон терма жамоасининг ягона голини 60-дақиқада Туркиянинг «Башакшехир» клубида тўп сураётган Аббосбек Файзуллаев киритди. Ушбу гол Ўзбекистон терма жамоасининг жаҳон чемпионатлари тарихидаги илк голи бўлди.

Ўйиндан сўнг Ўзбекистон терма жамоаси бош мураббийи Фабио Каннаваро жамоа қизиқарли ўйин намойиш этганини ва иккинчи бўлимда ўйин йўналишини ўзгартира олганини таъкидлади. Унинг сўзларига кўра, футболчилар бир нечта хавфли вазиятлар яратган ва ташаббусни ўз назоратига олишга ҳаракат қилган.

Мураббий терма жамоа турнирга Ўзбекистонни жаҳон аренасида муносиб тарзда намоён этиш мақсадида келганини таъкидлади. Шунингдек, у жамоа ўйинида хатолар бўлганини тан олди ва мураббийлар штаби уларни бартараф этиш устида ишни давом эттиришини билдирди.

Каннаваронинг таъкидлашича, Колумбия каби жамоага қарши баҳс жиддий синов бўлган, аммо умумий ҳисобда иккинчи бўлимдаги ҳаракатлар ижобий таассурот қолдирган. Унинг фикрича, ушбу учрашув Ўзбекистон футболи учун тарихий ўйин сифатида ёдда қолади.

Биринчи турдан сўнг К гуруҳида Колумбия терма жамоаси уч очко жамғарди. Гуруҳнинг яна бир учрашувида Португалия ва ДР Конго терма жамоалари 1:1 ҳисобида дуранг ўйнади.

Иккинчи турда 23 июнь куни Ўзбекистон терма жамоаси Португалияга қарши баҳс олиб боради, Колумбия эса кейинги куни ДР Конго билан учрашади.

Футбол бўйича жаҳон чемпионати АҚШ, Канада ва Мексикада ўтказилмоқда. 48 та терма жамоа иштирок этаётган мусобақа 19 июль куни якунланади. Амалдаги жаҳон чемпиони Аргентина терма жамоаси ҳисобланади.