Тошкент, Ўзбекистон (UzDaily.uz) — Ўзбекистон терма жамоаси Япониянинг Айти-Нагоя шаҳрида бўлиб ўтаётган 2026 йилги Параосиё ўйинларида яна бир қатор медалларни қўлга киритди. Мамлакат вакиллари енгил атлетика, паравелоспорт, пауэрлифтинг ва парадзюдо бўйича баҳсларда олтин, кумуш ва бронза медалларига сазовор бўлди.
Енгил атлетика бўйича аёллар ўртасидаги T11 синфида 200 метрга югуриш мусобақасида Аслия Мирзаёрова 25,86 сония натижа билан иккинчи ўринни эгаллади. Масофани босиб ўтишда унга етакчи спортчи Сардор Бахтиёров ёрдам берди.
Ангелина Колесникова F44/F64 синфларида аёллар ўртасида диск улоқтириш баҳсларида 30,10 метр натижа билан бронза медалини қўлга киритди. Ёқутхон Ҳолбекова эса F12 синфида найза улоқтириш бўйича 32,43 метр натижа кўрсатиб, кумуш медалга сазовор бўлди. Ушбу йўналиш спортчининг асосий ихтисослиги ҳисобланмайди.
Эркаклар ўртасида Диёpбек Умаров F12 синфида ядро итариш бўйича 12,54 метр натижа билан учинчи ўринни эгаллади. Содиқжон Мамадиев T37 синфида узунликка сакраш мусобақасида 5,69 метр натижа кўрсатиб, бронза медалини қўлга киритди. Ёрқинбек Одилов эса F57 синфида диск улоқтириш бўйича 45,10 метр натижа билан кумуш медалга сазовор бўлди.
Паравелоспорт бўйича эркаклар ўртасида C5 синфида 4000 метр масофага таъқиб пойгасида ўзбекистонлик спортчилар биринчи ва иккинчи ўринларни эгаллади. Боймурод Явқочев мусобақа чемпиони бўлди, Азимбек Абдуллаев эса кумуш медални қўлга киритди. Бронза медали Бирлашган Араб Амирликлари вакилига насиб этди.
Аёллар ўртасида пауэрлифтинг бўйича 50 килограммгача бўлган вазн тоифасида Насиба Тошпўлатова финалда 123 килограмм тошни кўтариб, иккинчи ўринни эгаллади. 55 килограммгача бўлган вазн тоифасида эса Акидаҳон Ахтамова 128 килограмм натижа билан олтин медални қўлга киритди ва Параосиё ўйинлари рекордини ўрнатди.
Ушбу вазн тоифасида Хитой вакили 117 килограмм натижа билан кумуш, Таиланд спортчиси эса 112 килограмм натижа билан бронза медалига сазовор бўлди.
Ўзбекистонлик спортчилар парадзюдо бўйича ҳам олтин медалларни қўлга киритди. Эркаклар ўртасида J1 синфининг 81 килограммгача бўлган вазн тоифасида Шоҳруҳ Мамедов ғолиб бўлди. У финалда Тожикистон вакили устидан 002:0 ҳисобида ғалаба қозонди. Ушбу ғалаба Ўзбекистонга ўйинларда парадзюдо бўйича илк олтин медални тақдим этди.
J1 синфининг 95 килограммгача бўлган вазн тоифасида финалда икки ўзбекистонлик спортчи ўзаро куч синашди. Муҳаммад Абдуқулов Турғун Абдиевни 003:0 ҳисобида мағлуб этиб, олтин медални қўлга киритди. Турғун Абдиев эса кумуш медаль соҳиби бўлди. Ушбу вазн тоифасида бронза медаллари Эрон ва Индонезия спортчиларига насиб этди.
Аёллар ўртасида J2 синфининг 60 килограммгача бўлган вазн тоифасида Кумушхон Хўжаева чемпионликни қўлга киритди. У финал баҳсида Хитой вакиласини 100:001 ҳисобида мағлуб этди.
Ўзбекистонлик спортчиларнинг бир нечта спорт турларидаги муваффақиятли иштироки Айти-Нагояда ўтаётган Параосиё ўйинларида миллий терма жамоанинг медаллар жамғармасини янада бойитди.
