Тошкент, Ўзбекистон (UzDaily.uz) — 2026 йил 1 октябрь ҳолатига кўра, Ўзбекистон тижорат банкларининг соф фойдаси 15,26 трлн сўмни ташкил этди. Бу бир йил аввалги кўрсаткичдан 40,3 фоизга кўп. 2025 йил 1 октябрь ҳолатида ушбу кўрсаткич 10,88 трлн сўмга тенг бўлган. Бу ҳақда Ўзбекистон Марказий банки хабар берди.
Солиқ тўлангунига қадар бўлган фойда 34,8 фоизга ошиб, 17,44 трлн сўмга етди. Фойда солиғини тўлаш харажатлари эса анча кам суръатда — 5,8 фоизга ўсиб, 2,19 трлн сўмни ташкил қилди.
Банкларнинг фоизли даромадлари 18,5 фоизга ўсиб, 110,4 трлн сўмга етди. Фоизли харажатлар эса тезроқ ўсди — 21,4 фоизга ошиб, 79,2 трлн сўмни ташкил этди. Натижада соф фоизли маржа 11,8 фоизга кўпайиб, 31,3 трлн сўмга етди.
Фойда ўсишига асосий ҳиссани фоизсиз даромадлар қўшди. Улар 44,3 фоизга ўсиб, 76,2 трлн сўмни ташкил этди. Фоизсиз харажатлар эса 32,7 фоизга ошиб, 26,5 трлн сўмга етди. Банкларнинг фоизсиз соф даромади 1,9 баробарга кўпайиб, 23,4 трлн сўмни ташкил қилди.
Банкларнинг харажатлари ҳам ўсди. Операцион харажатлар 27,3 фоизга ошиб, 26,3 трлн сўмга етди. Кредитлар ва лизинг бўйича эҳтимолий йўқотишларни баҳолаш харажатлари 34 фоизга кўпайиб, 24,9 трлн сўмни ташкил қилди. Кредит билан боғлиқ бўлмаган йўқотишларни баҳолаш харажатлари эса 42,9 фоизга ошиб, 12,3 трлн сўмга етди.
Самарадорлик кўрсаткичлари яхшиланди. Активлар рентабеллиги (ROA) 2,1 фоиздан 2,37 фоизга, капитал рентабеллиги (ROE) эса 11,8 фоиздан 14,1 фоизга кўтарилди. Шу билан бирга, соф фоизли маржанинг жами активларга нисбати 4,53 фоиздан 4,24 фоизга, соф фоизли даромаднинг активларга нисбати эса 4,3 фоиздан 3,99 фоизга пасайди.
Банклар сектори умумий фойдасининг учдан икки қисми энг йирик банклар ҳиссасига тўғри келди. Активлари 30 трлн сўмдан ортиқ бўлган 12 та банк жами 10,3 трлн сўм фойда олди. Бу секторнинг умумий натижасининг 67,5 фоизини ташкил этади. Ушбу банкларда капитал рентабеллиги 12,35 фоизга тенг бўлди.
Капитал рентабеллигининг энг юқори кўрсаткичлари ўрта ҳажмдаги банкларда қайд этилди. Активлари 3 трлн сўмдан 10 трлн сўмгача бўлган олтита банкда ROE 23,65 фоизни, активлари 10 трлн сўмдан 30 трлн сўмгача бўлган 11 та банкда эса 20,8 фоизни ташкил қилди.
Охирги гуруҳдаги банклар 3,93 трлн сўм фойда олди. Активлари 3 трлн сўмгача бўлган энг кичик олтита банкнинг жами фойдаси 38,8 млрд сўмни ташкил этди. Уларда капитал рентабеллиги 1,96 фоизга тенг бўлди.
