Оролбўйи минтақасини ривожлантириш жамғармаси ташкил этилмоқда
Ўзбекистон Республикаси Презизенти Шавкат Мирзиёев 2017 йилнинг 18 январь куни “2017-2021 йилларда Оролбўйи минтақасини ривожлантириш давлат дастури тўғрисида”ги қарорга имзо чекди.
Мазкур жамғарма Оролбўйи минтақасида экологик ва ижтимоий-иқтисодий вазиятни, аҳолининг яшаш шароитларини яхшилашга, Орол денгизининг экологик фалокати оқибатларини юмшатиш бўйича инвестиция лойиҳаларини ўз вақтида ва самарали рўёбга чиқаришга йўналтирилган чора-тадбирлар комплексини амалга ошириш мақсадида тузилмоқда.
Жамғармани шакллантириш манбалари этиб қуйидагилар белгиланди:
Ўзбекистон Республикаси Тикланиш ва тараққиёт жамғармасига ўтказилиши лозим бўлган маблағларнинг 10%;
Автомобилларга газ тўлдирувчи компрессор станциялари томонидан сотиладиган табиий газга махсус инвестициявий устама ҳақнинг 10%;
Ўзбекистон Республикаси Давлат бюджетининг мақсадли маблағлари, шу жумладан марказлаштирилган инвестициялар;
Халқаро молия институтлари ва бошқа хорижий донорларнинг имтиёзли кредитлари (қарзлари);
Жисмоний ва юридик шахсларнинг, хайрия жамғармаларининг грантлари, ихтиёрий бадаллари, хорижий донорларнинг маблағлари;
Жамғарманинг вақтинча бўш маблағларини жойлаштиришдан тушадиган даромадлар;
Қонун ҳужжатларида тақиқланмаган бошқа молиялаштириш манбалари.
“2017-2021 йилларда Оролбўйи минтақасини ривожлантириш давлат дастури тўғрисида”ги қарорга мувофиқ, дастур доирасидаги лойиҳаларни амалга ошириш учун 8,422 трлн сўм маблағ сарфланади.
Дастур доирасида 67 та лойиҳа ва тадбирлар амалга оширилади.
