«Ўзбекнефтгаз» ва «Sinosur» молиялаштиришни кенгайтирмоқда

Тошкент, Ўзбекистон (UzDaily.uz) — “Ўзбекистон нефть ва гази – ОGU 2026” халқаро кўргазма ва анжумани доирасида «Ўзбекнефтгаз» АЖ Бошқарув раиси Абдуғани Сангинов Хитойнинг йирик экспорт-кредит агентлиги «Sinosur» корпорацияси раҳбари Шен Хетай бошчилигидаги делегацияси билан учрашув ўтказди.

Дастлаб «Ўзбекнефтгаз» АЖ билан кўп йиллик ҳамкорлик доирасида бурғилаш ускуналари ва қувур маҳсулотлари хариди учун экспорт-кредит молиялаштириш механизмлари самарали йўлга қўйилгани қайд этилди.

Музокаралар давомида томонлар молиявий ҳамкорликни янада кенгайтириш ва янги лойиҳаларни молиялаштириш имкониятларини муҳокама қилдилар.

Абдуғани Сангинов «Sinosur» билан ҳамкорлик «Ўзбекнефтгаз»нинг инвестициявий лойиҳаларини самарали молиялаштириш ва йирик технологик харидларни амалга оширишда муҳим ўрин тутишини таъкидлаб, келгусида ҳам шерикликни изчил ривожлантиришдан манфаатдор эканини билдирди.

Учрашув якунида томонлар амалий ҳамкорликни янада кенгайтириш ва янги молиявий лойиҳалар устида ишларни давом эттиришга келишиб олдилар.