Ўзбекистонда тадбиркорлик субъектларининг барқарорлик рейтинги тизими янгиланди

Тошкент, Ўзбекистон (UzDaily.uz) — Ўзбекистонда тадбиркорлик субъектларининг барқарорлик рейтингини аниқлаш тартибига ўзгартишлар киритилди.

Вазирлар Маҳкамасининг тегишли қарорига мувофиқ, мавжуд мезонлар тизимига янги кўрсаткичлар қўшилди ва амалдаги қатор мезонлар модернизация қилинди.

Эндиликда аввал белгиланган 23 та мезонга қўшимча равишда учта рағбатлантирувчи кўрсаткич жорий этилди ҳамда 11 та мезон бизнес самарадорлигини янада объектив баҳолаш, масъулиятли ва инновацион тадбиркорларни қўллаб-қувватлаш мақсадида такомиллаштирилди.

Янги мезонлар фойда солиғини тўлаш самарадорлиги, рақамли маркеровка қоидаларига риоя қилиш ва “яшил” энергиядан фойдаланиш каби кўрсаткичларни ўз ичига олади.

Солиқ тўлови бўйича ўртача кўрсаткичдан юқори натижага эришган ёки экспортдан юқори даромад олган тадбиркор 10 баллгача баҳоланиши мумкин.

Барча савдо нуқталарини онлайн-кассаларга улаш ва рақамли маркеровкани тўғри қўллаш учун 5 балл берилади.

Янгиланадиган энергия манбаларидан самарали фойдаланиш даражаси ўрнатилган қувват ва умумий энергия истеъмолидаги “яшил” энергия улушига қараб 5 баллгача баҳоланади.

Ушбу чоралар тадбиркорлик ҳамжамияти ўртасида солиқ интизомини мустаҳкамлаш, замонавий рақамли технологияларни жорий этиш ва экологик тоза энергетикани ривожлантиришни рағбатлантиришга қаратилган.