Тошкент, Ўзбекистон (UzDaily.uz) — Нукус шаҳрида «Ўзбекистон — Хитой» минтақалараро савдо-иқтисодий форуми якунлари бўйича умумий қиймати $400 миллиондан ортиқ бўлган қатор келишувлар имзоланди. Бу ҳақда Ўзбекистон Инвестициялар, саноат ва савдо вазирлиги хабар берди.
Форум 26 сентябрь куни Инвестициялар, саноат ва савдо вазири ўринбосари Илзат Қосимов иштирокида бўлиб ўтди. Тадбирни Инвестициялар, саноат ва савдо вазирлиги Қорақалпоғистон Республикаси Жўқорғи Кенгеси билан ҳамкорликда ташкил этди.
Форумда Ўзбекистон ва Хитой давлат органлари ҳамда ишбилармон доираларининг 400 га яқин вакили иштирок этди.
Хитой томонидан, хусусан, Шэньси провинцияси делегацияси, SilkRoad Industrial Cooperation Center, Shaanxi Yulin Energy Group ва China Civil Engineering Construction Corporation вакиллари қатнашди.
Хитойлик иштирокчиларга Қорақалпоғистоннинг инвестиция салоҳияти, минтақанинг ресурс базаси, инвесторлар учун амал қилаётган қўллаб-қувватлаш чоралари ва имтиёзлар, шунингдек, истиқболли лойиҳалар тақдим этилди.
Ишбилармонлик дастури доирасида томонлар тоғ-кон саноати, геология, ахборот технологиялари ва қишлоқ хўжалигида ҳамкорликни кенгайтириш имкониятларини кўриб чиқди.
Форум якунлари бўйича $400 миллиондан ортиқ суммадаги келишувлар расмийлаштирилди. Ҳужжатлар юқорида қайд этилган ва Ўзбекистон ҳамда Хитой ҳамкорлари ўртасидаги ҳамкорликнинг бошқа устувор йўналишларини қамраб олади.
