Ўзбекистон ва Тожикистон божхона хизматлари Андархон назорат-ўтказиш пунктини модернизация қилиш масаласини муҳокама қилишди

Тошкент, Ўзбекистон (UzDaily.uz) — Фарғона вилоятининг «Андархон» чегара божхона постида Ўзбекистон ва Тожикистон божхона хизматлари ўртасидаги Ишчи гуруҳнинг навбатдаги учрашуви бўлиб ўтди.

Мулоқот икки давлат ўртасидаги божхона соҳасидаги амалий ҳамкорликни янада чуқурлаштириш, чегара ўтказиш жараёнларини замонавий талаблар асосида ташкил этиш ҳамда ташқи иқтисодий алоқалар учун қулай шароитлар яратишга қаратилди.

Учрашув давомида Божхона қўмитаси раиси ўринбосари N.Musamuhammedov ва бошқа масъуллар томонидан чегара божхона постлари фаолияти самарадорлигини ошириш, ўтказиш жараёнларини тезлаштириш ва хизмат кўрсатиш сифатини яхшилаш масалаларига эътибор қаратилди.

Шунингдек, кун тартиби доирасида бир қатор устувор йўналишлар муҳокама қилинди. Хусусан, «Андархон–Патар» чегара ўтказиш пунктини реконструкция қилиш ва кенгайтириш орқали унинг ўтказувчанлик имкониятларини ошириш масаласи кўриб чиқилди.

Шунингдек, учрашувда божхона соҳасини рақамлаштириш бўйича тажриба алмашиш, интеграллашган чегара божхона маркази (ИКМ) тасвирлари билан маълумот алмашинувини йўлга қўйиш ва интеграция қилиш бўйича таклифлар ҳам муҳокама қилинди.

Мазкур учрашув Ўзбекистон ва Тожикистон божхона хизматлари ўртасидаги ишончли алоқаларни мустаҳкамлашга ва чегара ўтказиш пунктлари фаолиятини янада ривожлантиришга ҳамда икки давлат ўртасидаги иқтисодий ҳамкорликни янги босқичга олиб чиқишга хизмат қилади.