Ўзбекистон ва Сербия кончилик соҳасида ҳамкорликни муҳокама қилди
Тошкент, Ўзбекистон (UzDaily.uz) — Ўзбекистон ва Сербия тоғ-кон саноатида ҳамкорликни кенгайтириш истиқболларини, жумладан, ихтисослаштирилган техникалар ишлаб чиқариш, илғор технологияларни жорий этиш ва саноат кооперациясини ривожлантириш масалаларини муҳокама қилди.
Ҳамкорлик масалалари 2026 йил 7 сентябрь куни Белград шаҳрида Ўзбекистон-Сербия ҳукуматлараро комиссиясининг биринчи йиғилиши доирасида кўриб чиқилди. Йиғилишда тоғ-кон саноати ва геология вазирининг биринчи ўринбосари Ф. Ҳамидова иштирок этди.
Тадбир доирасида Ўзбекистон Тоғ-кон саноати ва геология вазирлиги вакиллари Сербия Тоғ-кон ишлари ва энергетика вазирлиги давлат котиби билан учрашув ўтказди.
Шунингдек, тоғ-кон, металлургия ва энергетика соҳалари учун ускуналар ва машиналар ишлаб чиқаришга ихтисослашган GOSA FOM компанияси билан ҳамкорликка алоҳида эътибор қаратилди.
Томонлар тоғ-кон саноати учун ихтисослаштирилган техникалар ишлаб чиқаришни кенгайтириш, шунингдек, замонавий технологияларни жорий этиш имкониятларини муҳокама қилди. Саноат кооперациясини ривожлантириш ва соҳанинг моддий-техника базасини мустаҳкамлаш ҳам устувор йўналишлар сифатида белгиланди.
Ўтказилган музокаралар Ўзбекистон ва Сербия ўртасида тоғ-кон саноати соҳасида ҳамкорликни ривожлантириш бўйича амалга оширилаётган ишларнинг бир қисми бўлди.
