Тошкент, Ўзбекистон (UzDaily.uz) — Ўзбекистон Миллий ижтимоий ҳимоя агентлиги Озарбайжон Меҳнат ва аҳолини ижтимоий ҳимоя қилиш вазирлиги вакиллари билан учрашув ўтказди.
Учрашувда аҳолини ижтимоий қўллаб-қувватлаш, ижтимоий тўловларни тайинлаш ва амалга ошириш, шунингдек, ижтимоий суғурта тизимини янада такомиллаштириш масалалари муҳокама қилинди.
Тадбир давомида икки мамлакат вакиллари ижтимоий ҳимоя соҳасида амалга оширилаётган ислоҳотлар ҳамда жорий этилган механизмлар бўйича тажриба алмашди. Ижтимоий тўловларни ташкил этиш амалиёти ва ижтимоий суғурта тизимининг фаолиятига алоҳида эътибор қаратилди.
Тадбир доирасида амалдаги ижтимоий қўллаб-қувватлаш ва суғурта механизмларига бағишланган тақдимотлар ҳам ўтказилди.
Учрашув якунлари бўйича томонлар ҳамкорликни давом эттириш, ижтимоий ҳимоя соҳасидаги ҳамкорликни ривожлантириш ва илғор тажриба алмашишга келишиб олди.
