Тошкент, Ўзбекистон (UzDaily.uz) — Олий Мажлис Сенати Раисининг биринчи ўринбосари Содиқ Сафоев Германия Бундестаги депутатлари Петер Фелзер ва Кристоф Биргханни қабул қилди.
Учрашувда Ўзбекистон–Германия муносабатларининг бугунги ҳолати ва уларни ривожлантириш истиқболлари муҳокама қилинди. Томонлар икки томонлама алоқаларни мустаҳкамлаш, қўшма ташаббусларни илгари суриш ва умумий лойиҳаларни амалга оширишда парламентлараро мулоқот муҳим ўрин тутишини таъкидлади.
Германиянинг Марказий Осиё давлатлари билан ҳамкорлигини кенгайтириш, шунингдек, илм-фан ва таълим соҳаларидаги шерикликни ривожлантириш масалаларига алоҳида эътибор қаратилди.
Германия парламентарийлари Ўзбекистоннинг минтақадаги ролини юқори баҳолаб, унинг географик жойлашуви, иқтисодий салоҳияти ва инсон капиталига алоҳида урғу берди. Улар Германиянинг Тошкент билан узоқ муддатли ва ўзаро манфаатли ҳамкорликни ривожлантиришдан манфаатдор эканини ҳам тасдиқлади.
Учрашув якунида томонлар белгиланган устувор йўналишлар бўйича амалий ҳамкорликни кенгайтириш ва мунтазам алоқаларни сақлаб қолишга тайёр эканини билдирди.
