Ўзбекистон ТИВ раҳбари АҚШ Давлат котиби билан телефон орқали мулоқот қилди

Тошкент, Ўзбекистон (UzDaily.uz) — Ўзбекистон ташқи ишлар вазири Бахтиёр Саидов АҚШ Давлат котиби Марко Рубио билан телефон орқали мулоқот ўтказди.

Ўзининг Telegram-каналида вазир суҳбат самимий ва самарали бўлганини таъкидлаб, унда икки томонлама ва кўп томонлама ҳамкорликнинг муҳим масалалари муҳокама қилинганини маълум қилди.

Ўзбекистон Ташқи ишлар вазирлиги ва АҚШ Давлат департаменти ўртасида стратегик шерикликни барча соҳаларда мустаҳкамлаш мақсадида яқин ҳамкорликни давом эттириш бўйича келишувга эришилди.

Саидовнинг сўзларига кўра, томонлар бизнес алоқаларини ривожлантириш, ўзаро савдо ҳажмини ошириш ва Марказий Осиё ҳамда унинг ташқарисида барқарор ва фаровон тараққиётни таъминлаш масалаларига алоҳида эътибор қаратган.