Ўзбекистон Қозоғистон ғалласини Афғонистонга транзит қилиш тарифини 40% га камайтирди

Тошкент, Ўзбекистон (UzDaily.uz) — Ўзбекистон Қозоғистондан Афғонистонга ғалла транзити учун тарифни 40% га пасайтирди. Бу ҳақда «Қозоғистон темир йўллари» матбуот хизмати хабар берди.

29 март куни Олмаота шаҳрида «Қазақстан темір жолы» ва «Ўзбекистон темир йўллари» раҳбариятининг ишчи учрашуви бўлиб ўтди. Унда транспорт ва логистика соҳасидаги ҳамкорликни янада ривожлантириш масалалари муҳокама қилинди, шунингдек, ўтган йилдаги қўшма фаолият якунлари кўриб чиқилиб, 2025 йил учун режалар белгиланди.

Қозоғистон Сари-Ағаш чегара ўтиш нуқтасининг ўтказиш қобилиятини 50% га ошириб, «барча юк юборувчилар режаларининг тўлиқ бажарилишини таъминлади».

Учрашув давомида «Ўзбекистон темир йўллари» вакиллари Қорақалпоғистондаги давлатлараро Оазис туташ нуқтасидан Сурхондарё вилоятидаги Ғалаба темир йўл станцияси орқали транзит қилинадиган қозоқ ғалласи учун тарифни 40% га камайтириш ҳақида маълум қилди.

Шунингдек, томонлар Трансафғонистон коридорини ривожлантириш бўйича қўшма ишларини фаоллаштиришга келишиб олдилар.