«Андижон полкаси» Гиннесс рекордлар китобига киритилди

Тошкент, Ўзбекистон (UzDaily.uz) — Ўзбек халқ рақси «Андижон полкаси» дунёдаги энг оммавий миллий рақс ижроси сифатида расман Гиннесс рекордлар китобига киритилди. Рекорд Андижон шаҳридаги «Бобур Арена» стадионида ўрнатилди. Унда бир вақтнинг ўзида 20 минг киши мазкур рақсни ижро этди. Бу ҳақда Андижон вилояти ҳокимлиги матбуот хизмати хабар қилди.

Гиннесс рекордлари ташкилотининг расмий вакили тадбирда шахсан иштирок этиб, жараён барча белгиланган талабларга тўлиқ жавоб беришини тасдиқлади. Шундан сўнг рекорд расман рўйхатга олинди.

Ушбу воқеа Андижон шаҳри 2026 йил учун Туркий дунёнинг маданий пойтахти деб эълон қилинган кунда бўлиб ўтди.

«Андижон полкаси» — ўзбек халқ рақси ва шу номдаги мусиқий куй бўлиб, тез суръати ҳамда қўл ҳаракатларининг таъсирчанлиги билан ажралиб туради. Илк даврларда мазкур рақс асосан эркаклар томонидан ижро этилган, кейинчалик эса аёллар орасида ҳам кенг оммалашган.

Андижон Марказий Осиёнинг энг қадимий шаҳарларидан бири бўлиб, Фарғона водийсининг шарқий қисмида жойлашган. Шаҳарнинг тарихи тахминан 2,5 минг йилни ташкил этади. Ўз вақтида у Буюк ипак йўлида муҳим аҳамиятга эга бўлган. Бугунги кунда Андижон Ўзбекистоннинг йирик маъмурий, иқтисодий ва маданий марказларидан бири ҳисоблана