Тошкент, Ўзбекистон (UzDaily.uz) — Ўзбекистонда мамлакат, Озарбайжон ва Туркия махсус бўлинмалари ҳарбий хизматчилари иштирокида «Абадий биродарлик — V» номли кўп миллатли қўшма махсус кучлар ҳарбий машғулотлари бўлиб ўтди.
Машғулотлар минтақавий хавфсизлик ва барқарорликни мустаҳкамлаш, ҳарбий ҳамкорликни ривожлантириш ҳамда уч мамлакат махсус кучлари бўлинмалари ўртасидаги ўзаро ҳамкорликни кучайтиришга қаратилди.
Машғулотлар давомида ҳарбий хизматчилар тажриба алмашиб, қўшма операцияларни режалаштириш ва амалга ошириш бўйича машқлар ўтказди.
Дастур тоғли ҳудудлар ва аҳоли пунктларида жанговар вазифаларни бажариш, шартли душман ортига кириб бориш, разведка-қидирув тадбирларини ўтказиш ҳамда муҳим объектларни эгаллаш каби машқларни қамраб олди.
Иштирокчилар, шунингдек, аксилтеррор операциялари доирасида гаровга олинганларни озод қилиш ва стратегик объектларни қўриқлаш бўйича машқлар бажарди.
Кундузи ва тунда турли калибрдаги ўқотар қуроллар, снайпер милтиқлари ҳамда махсус воситалардан отиш машғулотлари ўтказилди.
Машғулотларнинг якуний босқичини Озарбайжон Махсус кучлари қўмондони, генерал-майор Алекпер Жаҳонгиров манёврлар раҳбарияти билан биргаликда кузатди.
У Озарбайжон ҳарбий хизматчиларининг жанговар кўникмалари ва тайёргарлик даражасини юқори баҳолади.
Машғулотлар якунлари бўйича белгиланган вазифаларни бажаришда алоҳида ажралиб турган ҳарбий хизматчиларни тақдирлаш маросими бўлиб ўтди. Тадбир иштирокчиларнинг биргаликда суратга тушиши билан якунланди.
