Тошкент, Ўзбекистон (UzDaily.uz) — Тошкент вилояти халқ депутатлари Кенгаши ва Корея Республикасининг Кёнсан-Намдо провинцияси Кенгаши делегациялари минтақалараро ҳамкорлик истиқболлари ҳамда маҳаллий бошқарув соҳасида тажриба алмашиш масалаларини муҳокама қилди.
Учрашув 12 октябрь куни Тошкент вилояти касаба уюшмалари федерацияси биносида бўлиб ўтди. Унда Жанубий Кореядан 21 нафар депутат ва Тошкент вилоятидан тўққиз нафар депутат иштирок этди.
Ўзбекистон томони вакиллари маҳаллий вакиллик органлари фаолиятини такомиллаштиришга қаратилган ислоҳотлар ҳақида маълумот берди. Тошкент вилояти халқ депутатлари Кенгаши котибияти раҳбари О. Анаров ва Қибрай тумани халқ депутатлари Кенгаши раиси Б. Маҳамадалиев маърузалар билан чиқиш қилди.
Муҳокамаларда Ўзбекистонда маҳаллий Кенгашлар ваколатларини кенгайтириш, депутатлик назоратини кучайтириш ва аҳоли манфаатларини ҳимоя қилиш самарадорлигини ошириш масалалари кўриб чиқилди. Иштирокчилар маҳаллий бошқарувда гендер тенглигини таъминлаш, хотин-қизларнинг ижтимоий-сиёсий ҳаётдаги иштирокини кенгайтириш ва ёшларни қўллаб-қувватлаш масалаларини ҳам муҳокама қилди.
Жанубий Корея депутатлари мамлакатдаги маҳаллий вакиллик органлари фаолияти тажрибаси билан ўртоқлашиб, уларнинг ваколатлари ва ҳудудларни бошқаришдаги ўрни ҳақида маълумот берди.
Муҳокамаларда «Корея — Марказий Осиё» дўстлик депутатлик гуруҳи раиси ва Таълим қўмитаси аъзоси Пак Ин, гуруҳ аъзоси, мувофиқлаштирувчи қўмита раиси ўринбосари ҳамда Режалаштириш ва давлат бошқаруви қўмитаси аъзоси И Гван Мен, шунингдек, гуруҳ аъзоси ва Таълим қўмитаси раиси ўринбосари Ким Бон Нам иштирок этди. Улар икки ҳудуд вакиллик органлари ўртасидаги ҳамкорликни кенгайтириш муҳимлигини таъкидлади.
Томонлар Кенгашлар депутатлари ва котибият ходимлари ўртасида тажриба алмашиш масаласига алоҳида эътибор қаратди.
Муҳокама қилинган йўналишлар қаторида маҳаллий бошқарувга рақамли технологияларни жорий этиш, фуқаролар мурожаатлари билан ишлаш ва депутатлик назорати механизмларини такомиллаштириш масалалари ҳам бўлди.
Иштирокчилар иқтисодий, инвестициявий ва технологик ҳамкорликни ривожлантириш, таълим муассасалари, ёшлар ва мутахассислар ўртасидаги алоқаларни мустаҳкамлаш имкониятларини ҳам кўриб чиқди.
Истиқболли йўналишлар сифатида қишлоқ хўжалигида замонавий технологияларни қўллаш, шунингдек, маданият ва туризм соҳаларида қўшма ташаббусларни амалга ошириш қайд этилди.
Учрашувнинг асосий масалаларидан бири Тошкент вилояти халқ депутатлари Кенгаши ва Кёнсан-Намдо провинцияси Кенгаши ўртасида дўстлик ва ҳамкорлик тўғрисидаги ниятлар баёнотини имзолаш ташаббуси бўлди.
Ушбу ҳужжат вакиллик органлари ўртасидаги алоқаларни тизимли йўлга қўйиш ва қўшма ташаббусларни тайёрлаш учун асос бўлиб хизмат қилиши кутилмоқда.
Учрашув якунида томонлар тажриба алмашишни давом эттириш ва муҳокама қилинган йўналишлар бўйича ҳамкорлик имкониятларини янада пухта ишлаб чиқиш зарурлигини таъкидлади.
