Ўзбекистон миллий футбол терма жамоасига италиялик физиотерапевт қўшилди

Тошкент, Ўзбекистон (UzDaily.uz) — Ўзбекистон миллий футбол терма жамоаси мураббийлар штабига физиотерапия ва реабилитация бўйича италиялик мутахассис Алдо Эспозито қўшилди. Бу ҳақда Ўзбекистон футбол ассоциацияси хабар қилди.

У жамоада футболчиларни тиклаш, жароҳатларнинг олдини олиш ва реабилитация жараёнларини кузатиб бориш учун масъул бўлади.

Эспозито профессионал футболда кўп йиллик иш тажрибасига эга. У турли йилларда Италиянинг «Кальяри» ва «Ювентус» клублари тиббий штабларида фаолият юритган, шунингдек, Италия миллий терма жамоасида ҳам ишлаган.

Мутахассис фаолияти давомида бешта жаҳон чемпионати ва бешта Европа чемпионатида иштирок этган. Италия терма жамоаси таркибида у 2006 йилги жаҳон чемпиони бўлган.

Бундан ташқари, Эспозито FIFA клублар ўртасидаги жаҳон чемпионати ва УЕФА Чемпионлар лигасида ғолиб чиққан жамоаларда ҳам фаолият олиб борган.

Италиялик мутахассиснинг тайинланиши Ўзбекистон миллий терма жамоасида тиббий ва тикланиш йўналишини кучайтириш доирасида амалга оширилди.