Ўзбекистон мева-сабзавотларни ишлаб чиқаришни 2020-йилга келиб икки баравар оширади

Тошкент, Ўзбекистон (UzDaily.uz) -- Ўзбекистон 2020-йилга келиб мева-сабзавотларни етиштиришни 32 млн. тоннага етказишни режалаштирмоқда. Бу ҳақда Ўзбекистон Бош вазири Шавкат Мирзиёев Халқаро мева-сабзавот ярмаркасининг очилиш маросимида қайд этди.

Ўзбекистон ҳар йили 16 млн. тоннадан ортиқ мева-сабзавот маҳсулотларини етиштирмоқда, дея таъкидлади Шавкат Мирзиёев. Унинг сўзларига кўра мазкур ҳажм 2020-йилга келиб икки бараварга ортади.

У шунингдек, Ўзбекистон йилига 6 млн. тонна пахта хом ашёсини етиштирганини эслатиб ўтди. Ҳозирда эса йилига 3 млн. тонна пахта хом ашёси етиштирилади, пахтадан бўшаган майдонлар эса озиқ-овқат маҳсулотлари, жумладан, буғдой ва мева-савзавот маҳсулотларига ажратиб берилган.

Ўзбекистон Бош вазирининг қайд этишича, мустақиллик йилларида Ўзбекистонда сабвазотлар етиштириш 8 баравар, мевалар 5 баравар, полиз экинлари 8 баравар ва узум 9 бараварга ортган.

Бош вазирнинг маълумот беришича, ҳозирда Ўзбекистонда 160 мингдан ортиқ фермер хўжаликлари фаолият кўрсатаётган бўлиб, улар ички ва ташқи бозорни сифатли мева ва сабзавотлар билан таъминламоқда.

2015-йилда Ўзбекистонда 12,59 млн. тонна сабзавотлар, жумладан картошка, шунингдек, 1,85 млн. тонна полиз, 1,55 млн. тонна узум ва 2,73 млн. тонна мевалар ишлаб чиқарилган.