Ўзбекистон консулхонаси Олтой ўлкасидаги ҳолатга изоҳ берди

Тошкент, Ўзбекистон (UzDaily.uz) — Ўзбекистон Республикасининг Новосибирск шаҳридаги Бош консулхонаси ижтимоий тармоқларда Олтой ўлкасининг Бийск шаҳридаги қурилиш объектида Ўзбекистон фуқароси мажбурий меҳнатга жалб қилингани ҳақида тарқалаётган маълумотларга муносабат билдирди.

Консулхона маълумотига кўра, муассаса вакиллари хабарларда тилга олинган 2002 йилда туғилган Ўзбекистон фуқароси билан зудлик билан боғланган.

Суҳбат давомида аниқланишича, йигит 2026 йил май ойи охирида қурилиш объектига келган. Қайд этилишича, иш берувчи томонидан зарур ҳужжатлар, жумладан патент расмийлаштирилган, шунингдек унинг иш жойига кўчиб келиш билан боғлиқ харажатлар ҳам қопланган.

Ҳозирги вақтда Бош консулхона фуқаронинг ҳужжатларини қайтариш, шунингдек уни Ватанга қайтариш учун авиачипталар харид қилиш масаласини ҳал этмоқда.

Дипломатик ваколатхонада вазият алоҳида назоратга олингани таъкидланди ҳамда оммавий ахборот воситалари текширилмаган маълумотларни эълон қилишдан тийилишга чақирилди.