Тошкент, Ўзбекистон (UzDaily.uz) — 7 октябрь куни Кобулда очилган Имом Абу Ҳанифа номидаги бешинчи миллий ва халқаро кўргазма-ярмаркасида Ўзбекистондан 200 га яқин тадбиркор ва ишлаб чиқарувчи иштирок этмоқда. Тадбир Афғонистон Савдо-инвестиция палатаси томонидан ташкил этилган.
Ўзбекистон делегациясига Ўзбекистон Савдо-саноат палатаси раисининг ўринбосари Шерзод Ибрагимов ва Кичик бизнес ассоциацияси раиси Музаффархон Мусаев бошчилик қилмоқда.
Ўзбекистонлик иштирокчилар турли тармоқларга мансуб маҳсулотларни «Made in Uzbekistan» миллий стендида намойиш этмоқда.
Экспозициядан қишлоқ хўжалиги ва озиқ-овқат саноати маҳсулотлари, тоғ-кон металлургияси ва электротехника мажмуалари маҳсулотлари, қурилиш материаллари, автомобилсозлик саноати маҳсулотлари, тиббий ускуналар ва дори воситалари, тўқимачилик маҳсулотлари ҳамда тайёр кийим-кечаклар ўрин олган.
Бундан ташқари, ўзбекистонлик компаниялар туризм ва таълим хизматларини ҳам тақдим этмоқда.
Кўргазма доирасида B2B учрашувлари, бизнес-форум ва савдо музокаралари ўтказилиши режалаштирилган. Иштирокчилар афғонистонлик тадбиркорлар билан ишбилармонлик алоқаларини ривожлантириш, кооперация лойиҳаларини амалга ошириш ва Ўзбекистон маҳсулотларининг Афғонистон бозорига етказиб берилишини кўпайтириш имкониятларини муҳокама қилишни мақсад қилган.
Кўргазмада Ўзбекистон автомобилсозлик саноати маҳсулотларига ҳам алоҳида эътибор қаратилган. Экспозицияда кузов қисмлари, автомобиль ойнаси, фаралар, фильтрлар, ёқилғи баклари, дисклар, шиналар, сўндиргичлар ва бошқа эҳтиёт қисмлар намойиш этилмоқда. Шунингдек, енгил электр транспорт воситалари ҳам тақдим этилган.
Ўзбекистон томони маълумотларига кўра, намойиш этилаётган автомобиль маҳсулотлари афғонистонлик тадбиркорлар ва салоҳиятли харидорларда қизиқиш уйғотмоқда. Музокаралар давомида маҳсулотларни Афғонистон бозорига етказиб бериш, шунингдек, дилерлик ва дистрибьюторлик фаолияти соҳасида ҳамкорлик қилиш имкониятлари муҳокама қилинмоқда.
Кўргазмада иштирок этиш ўзбекистонлик ишлаб чиқарувчилар учун Афғонистон бизнеси вакиллари билан тўғридан-тўғри алоқалар ўрнатиш, янги ҳамкорлар топиш ва экспорт имкониятларини кенгайтириш имконияти сифатида қаралмоқда.
Имом Абу Ҳанифа номидаги бешинчи миллий ва халқаро кўргазма-ярмаркаси Кобулда 13 октябрга қадар давом этади.
