Норвегия ЖЧдаги илк ўйинда Ироқни йирик ҳисобда енгди

Тошкент, Ўзбекистон (UzDaily.uz) — Футбол бўйича жаҳон чемпионатида Норвегия терма жамоаси ишончли старт олди ва гуруҳ босқичининг биринчи турида Ироқ жамоасини 4:1 ҳисобида мағлуб этди. Учрашув АҚШнинг Массачусетс штатидаги Фоксборо шаҳрида бўлиб ўтди.

Учрашувнинг бош қаҳрамони Эрлинг Холанд бўлди. У 29 ва 43-дақиқаларда дубль қайд этди. Норвегия жамоасининг яна икки голига 76-дақиқада Лео Остигард ва қўшимча вақтда Кристиан Торстведт муаллифлик қилди. Ироқ терма жамоасининг ягона голини 39-дақиқада Айман Ҳуссейн киритди.

Ироқ терма жамоаси учун бу 1986 йилдан буён жаҳон чемпионатларидаги илк учрашув бўлди. Норвегия эса 1998 йилдан кейин биринчи марта жаҳон биринчилигига қайтди. Норвегияликларнинг жаҳон чемпионатларидаги энг яхши натижаси 1938 ва 1998 йилларда 1/8 финалга чиқиш бўлиб қолмоқда.

Биринчи тур якунларига кўра I гуруҳида Норвегия ва Франция терма жамоалари уч очкодан тўплади. Аввалроқ Франция Сенегални 3:1 ҳисобида мағлуб этган эди.

Иккинчи турда Норвегия Сенегалга қарши майдонга тушади, Ироқ эса Франция билан баҳс олиб боради. Учрашувлар Москва вақти билан 23 июнга ўтар кечаси бўлиб ўтади.

Жаҳон чемпионати АҚШ, Канада ва Мексикада ўтказилмоқда ва 19 июль куни якунланади. Турнир тарихида илк бор унда 48 та терма жамоа иштирок этмоқда ва улар 12 та гуруҳга бўлинган. Плей-офф босқичига ҳар бир гуруҳдан энг яхши икки жамоа, шунингдек учинчи ўринни эгаллаган саккизта энг яхши терма жамоа йўл олади.