Нодирбек Абдусатторов TePe Sigeman Chess турнирида учинчи ўринни эгаллади

Тошкент, Ўзбекистон (UzDaily.uz) — Ўзбекистонлик шахматчи Нодирбек Абдусатторов Швециянинг Мальмё шаҳрида бўлиб ўтган TePe Sigeman Chess 2026 мусобақасида учинчи ўринни қўлга киритди. Гроссмейстер турнирни мағлубиятсиз якунлаб, бир ғалаба ва олти дуранг натижасини қайд этди. Турнир ғолиби Магнус Карлсен бўлди.

Якуний тур олдидан Нодирбек Абдусатторов қўшимча тай-брейкда биринчи ўрин учун курашиш имкониятини сақлаб турган. Бунинг учун у нидерландиялик гроссмейстер Йорден ван Форестни мағлуб этиши ва бошқа партиялар натижасини кутиши керак эди. Бироқ учрашув дуранг билан якунланди. Ван Форест Грюнфельд ҳимоясини қўллаб, позицияни тенглашган якунга олиб келди.

Бу дуранг Нодирбек Абдусатторов учун старт туридаги ғалабадан кейинги олтинчи кетма-кет дуранг бўлди. У Энди Вудворд ва Арджун Эригайсига қарши партияларда ғалаба имкониятларига эга бўлган, аммо устунликни тўлиқ амалга ошира олмаган. Турнир якунларига кўра, у 2,6 рейтинг очкони йўқотди ва жорий онлайн рейтинг 2777,4 пунктни ташкил этди.

Chess.com маълумотларига кўра, Нодирбек Абдусатторов Ўзбекистоннинг биринчи рақамли шахматчиси мақомини сақлаб қолмоқда. Унинг ортидан Жавоҳир Синдаров 2776 рейтинг очко билан жойлашган.

Етти тур якунларига кўра, Абдусатторов 14 ёшли туркиялик шахматчи Яғиз Каан Эрдоғмуш билан учинчи ўринни бўлишди. Якуний турда Эрдоғмуш Магнус Карлсенга мағлуб бўлди.

Турнир ғолибини аниқлаш тай-брейкка қадар давом этди. Арджун Эригайси сўнгги турга якка пешқадам сифатида чиққан, аммо Энди Вудворд билан дуранг ўйнади. Магнус Карлсен эса Яғиз Каан Эрдоғмушни мағлуб этиб, очколар бўйича тенглашди.

Тай-брейкда шахматчилар 3+2 назорат вақтида икки блиц партия ўтказди. Биринчи партияда Карлсен, иккинчисида Эригайси ғалаба қозонди. Ҳал қилувчи партияда норвегиялик гроссмейстер оқ фигуралар билан ўйнаб, регламентга кўра қўшимча 30 сония олди ва ғалаба қозониб, турнирда биринчи ўринни эгаллади.

TePe Sigeman Chess 1–7 май кунлари Мальмё шаҳрида ўтказилди. Мусобақада саккиз нафар шахматчи айлана тизимида ўзаро беллашди. Классик партиялардаги вақт назорати 40 юриш учун 90 дақиқа, кейин эса партия охиригача 30 дақиқа ва ҳар бир юриш учун 30 сония қўшимча вақтдан иборат бўлди.