Наманганда 577 млн сўмлик дори воситалари мусодара қилинди

Тошкент, Ўзбекистон (UzDaily.uz) — Наманганда тегишли ҳужжатлари ва сифат кафолати бўлмаган 13 184 дона дори воситаси аниқланди. Уларнинг умумий қиймати 577,381 миллион сўмни ташкил этган. Тезкор тадбир Давлат хавфсизлик хизмати, Иқтисодий жиноятларга қарши курашиш департаменти ва Божхона қўмитаси ходимлари томонидан ўтказилди.

Наманган шаҳридаги хонадонлардан бирини холислар иштирокида кўздан кечириш вақтида 56 турдаги дори воситалари аниқланди.

Ҳуқуқни муҳофаза қилувчи органлар маълумотига кўра, 1996 йилда туғилган фуқаро препаратларни кейинчалик сотиш мақсадида санитария меъёрларига зид равишда сақлаган.

Мусодара қилинган дорилар орасида «Цефотаксим», «Бифидумбактерин», «Атропин», «Тидомет Форте» ва бошқа препаратлар бўлган.

Баҳолаш хулосасига кўра, уларнинг умумий қиймати 577 миллион 381 минг сўмни ташкил этган.

Дори воситалари ноқонуний омбор сифатида фойдаланилган хонада сақлангани аниқланган. Идоралар маълумотига кўра, препаратлар қўшни республика ҳудудидан айланма йўллар орқали олиб кирилган.

Фуқарога нисбатан Ўзбекистон Жиноят кодексининг 186-3-моддаси 3-қисми «а» банди билан жиноят иши қўзғатилган. Ҳозирда тергов ҳаракатлари олиб борилмоқда.

Фуқаролардан шунга ўхшаш ҳуқуқбузарликлар ҳақида Давлат хавфсизлик хизматига 1520 қисқа рақами орқали хабар бериш сўралди.

Мурожаат қилувчиларнинг шахси сир сақланиши кафолатланади.