Мирзиёев Трампга ўзбек анъанавий айвонларини совға қилди

Тошкент, Ўзбекистон (UzDaily.uz) — Ўзбекистон Президенти Шавкат Мирзиёев АҚШ Президенти Дональд Трампга анъанавий ўзбек айвонларини совға қилди. Улар Вашингтондаги West Potomac Park ҳудудига ўрнатилиши режалаштирилган. The New York Times маълумотларига кўра, совға келажакда барпо этилиши режалаштирилаётган Америка қаҳрамонлари миллий боғи учун мўлжалланган. Бу ҳақда The New York Times хабар берди.

АҚШ Ички ишлар вазирлиги Мирзиёев айвонларни Трампга топширганини тасдиқлади. Америка президенти совғани АҚШ халқи номидан қабул қилди.

Парк ташриф буюрувчилари анъанавий иншоотларни куздаёқ кўриши мумкин. Нашрда қайд этилишича, Ўзбекистонда айвонлар паркларнинг анъанавий элементларидан бири ҳисобланади ва улар мураккаб ёғоч ўймакорлиги билан ажралиб туради.

Америка қаҳрамонлари миллий боғи ҳозирча лойиҳалаштириш босқичида. Трамп режасига кўра, унинг ҳудудига АҚШнинг таниқли шахсларига бағишланган тахминан 250 та тўлиқ ҳажмдаги ҳайкал ўрнатиш, шунингдек, бассейнлар, ресторанлар ва амфитеатр барпо этиш режалаштирилган.

Айвонлар Вашингтонда келажакда ташкил этиладиган парк маконининг бир қисмига айланиши кутилмоқда.