Мирзиёев Денизлидаги ЙТҲ муносабати билан Туркияга ҳамдардлик билдирди

Тошкент, Ўзбекистон (UzDaily.uz) — Ўзбекистон Республикаси Президенти Шавкат Мирзиёев Денизли вилоятида йўловчи автобуси иштирокида содир бўлган йўл-транспорт ҳодисаси оқибатида инсонлар ҳалок бўлгани ва жабрланганлар борлиги муносабати билан Туркия Республикаси Президенти Режеп Таййип Эрдоғанга ҳамдардлик йўллади.

Давлат раҳбари ҳалок бўлганларнинг оила аъзоларига чуқур таъзия ва ҳамдардлик изҳор этиб, жабрланганларнинг барчасига тезроқ соғайиб кетишини тилади.

Туркия оммавий ахборот воситалари маълумотларига кўра, ҳалокат якшанба куни эрталаб мамлакатнинг ғарбий қисмида содир бўлган. Pamukkale туристик компаниясига тегишли автобус Измирдан Анталияга йўналиш бўйича ҳаракатланиб, 38 нафар йўловчи ва уч нафар экипаж аъзосини ташиб кетаётган бўлган.

Маҳаллий вақт билан тахминан соат 01:40 да транспорт воситаси йўл тўсиқларига келиб урилган, шундан сўнг ёнғин чиққан.

Ҳодиса оқибатида камида саккиз киши, жумладан автобус ҳайдовчиси ҳалок бўлган.

Яна 33 нафар киши турли даражада жароҳат олиб, шифохонага ётқизилган.